Հայ երգիչ-բանահավաք, ազգագրագետ Հայրիկ Մուրադյանի թոռը՝ Արթուր Մուրադյանը, նույնպես միացել է Համահայկական սիմֆոնիկ նվագախմբին:
Պորտուգալիայում ծնված եւ այժմ Հոլանդիայում ապրող Արթուր Մուրադյանն այս օրերին Հայաստանում է: Ապրիլի 24-ին Արթուրը աշխարհի տարբեր երկրներից ժամանած երաժիշտների հետ համերգ է ունենալու Երեւանում:
Ալտահար Արթուր Մուրադյանին հանդիպեցինք Ծիծեռնակաբերդի հուշահամալիրում: Երաժիշտներով եկել էին՝ հարգանքի տուրք մատուցելու Ցեղասպանության զոհերի հիշատակին:
NEWS.am-ի հետ զրույցում 27-ամյա ալտահարն ասում է, որ Ցեղասպանության ճանաչման հարցում երաժշտությունն ու արվեստը կարող են մեծ դերակատարում ունենալ:
«Երաժշտությունը մարդկանց միացնում է, իսկ հենց մարդիկ միավորվում են, էմոցիոնալ մեծ դաշտ է ստեղծվում, որն ամենակարեւորն է»,- նշում է նա:
Այս կոնտեքստում Արթուրը կարեւորում է նաեւ իր պապի՝ Հայրիկ Մուրադյանի կատարած աշխատանքը, հիշեցնում է՝ Ցեղասպանությունից հետո պապը հավաքել ու պահպանել է երաժշտությունը: Հայրիկ Մուրադյանին Արթուրն այնքան էլ լավ չի հիշում. Փոքր է եղել, երբ նա մահացել է:
«Հայրիկ Մուրադյանը շատ բարի մարդ էր, շատերին էր օգնում, Ցեղասպանությունից հետո երաժշտությունը հավաքել է եւ պահպանել, ինչը շատ մեծ ու կարեւոր աշխատանք է՝ ըստ իս»,- ասում է Արթուրն ու քիչ անց շարունակում. «Ասում են, որ իմ ու Հայրիկ Մուրադյանի միջեւ նմանություններ կան»:
Նշենք, որ Արթուր Մուրադյանի ամբողջ ընտանիքը երաժիշտներ են: Մայրական պապիկն էլ հայտնի կոմպոզիտոր Հարություն Դալլալյանն է:
Լուսանկարները՝ NEWS.am—ի եւ Արթուր Մուրադյանի ֆեյսբուքյան էջից