Ֆրանսիայի նախագահական ընտրություններին մասնակցող թեկնածուներից որն էլ ընտրվի՝ Ֆրանսիայի հայ դատի հանձնախումբը կկարողանա աշխատել նրա հետ: Այսօր՝ ապրիլի 23-ին, NEWS.am-ի հետ զրույցում ասաց ՀՅԴ Բյուրոյի անդամ Կիրո Մանոյանը ՝ նշելով, որ Ֆրանսիայի հայ համայնքն այժմ նախընտրած թեկնածու չունի:
«Տարբեր թեկնածուներ այս անգամ սկսել են նույնիսկ Արցախի հարցի մասին խոսել, ոչ միայն՝ Հայոց ցեղասպանության: Հայ համայնքը որոշել է չաջակցել ոչ մեկին, բայց ընտրություններից հետո ով էլ ընտրվի՝ վստահ եմ, որ հայ համայնքը կկարողանա նրա հետ աշխատել»,-ասաց նա:
Կիրո Մանոյանն անդրադառնալով զգային կամ կրոնական հողի վրա ցեղասպանությունների եւ զանգվածային սպանությունների ժխտումը քրեականացնելու մասին Ազգային Ասամբլեայի դեկտեմբերի 22-ին ընդունած որոշումը Ֆրանսիայի Սահմանադրական խորհրդի կողմից չեղարկելուն, նշեց, որ Ֆրանսիայի հայ դատի հանձնախումբն այս ուղղությամբ շարունակելու է աշխատանքները:
«Նախագահի թեկնածուներից մեկը խոստացել է, որ անպայման կանցկացնի , ապագայի հարց է սա, քանի որ նախագահական ընտրություններից հեոո Ազգային Ժողովի ընտրություններ տեղի կունենան, հետո նոր պարզ կլինի այդ հարցը կբարձրավի, թե ոչ եւ ինչ ձեւով կբարձրացվի»,-ասաց նա:
NEWS.am-ը տեղեկացրել էր, որ Ֆրանսիայի Սահմանադրական խորհուրդը հունվարի 26-ին չեղարկել է ազգային կամ կրոնական հողի վրա ցեղասպանությունների եւ զանգվածային սպանությունների ժխտումը քրեականացնելու մասին Ազգային Ասամբլեայի դեկտեմբերի 22-ին ընդունած որոշումը:
Հիշեցնենք, որ այսօր՝ ապրիլի 23-ին, Ֆրանսիայում տեղ է ունենում նախագահական ընտրություններ: Նախագահական պաշտոնի համար մրցապայքարում իր թեկնածությունն է առաջադրել 11 քաղաքական գործիչ:
Նախագահական ընտրություններում հաղթանակ տանելուն առավել մոտ չորս թեկնածուներն են՝ Ֆրանսիայի նախկին վարչապետ, «Հանրապետականներ» կուսակցության պահպանողական թեկնածու Ֆրանսուա Ֆիյոնը, Ֆրանսիայի «Ազգային ճակատ» ազգայնական կուսակցության առաջնորդ Մարին Լը Պենը, Ֆրանսիայի էկոնոմիկայի նախկին նախարար, «Առաջ» սոցիալ-լիբերալ կուսակցությունը ներկայացնող Էմանուել Մակրոնը, «Չհնազանդվող Ֆրանսիան» ձախ շարժման առաջնորդ Ժան-Լյուկ Մելանշոնը: