Թբիլիսիում երեկ երեկոյան ջահերով երթ է տեղի ունեցել՝ կապված Հայոց ցեղասպանության 102-րդ տարելիցի հետ։ Այս մասին NEWS.am-ի թղթակցին հայտնել է «Բազմազգ Վրաստան» շարժման նախագահ Առնոլդ Ստեփանյանը։
Ավելի վաղ jam-news-ը հայտնել է այն մասին, որ Թբիլիսիում ակցիաները, հավանաբար, հարցականի տակ են՝ Վրաստանի մայրաքաղաքի քաղաքապետարանի դիրքորոշման պատճառով։ Իսկ կազմակերպության հետագա գործողությունները պարզելու համար Վրաստանի հայ համայնք զանգահարել չհաջողվեց։
Ինչպես նշել է Արնոլդ Ստեփանյանը, համաձայն երկրի օրենսդրության՝ եթե հավաքի ընթացքում փողոցում երթեւեկությունը փակելու մտադրություն չկա, ապա քաղաքապետարանի իշխանություններին կարելի է չտեղեկացնել, եւ որեւէ բան արգելել քաղաքապետարանը չի կարող։ «Մենք չէինք էլ պատրաստվում փակել երթեւեկությունը, որովհետեւ բոլոր ծրագրված իրադարձություններն օրակարգում են»,-նշել է Ստեփանյանը՝ հավելելով, որ Թուրքիայի դեսպանատան մոտ հանրահավաք իրականացնելու համար թույլտվություն չպահանջվեց։
Նա հայտնել է, որ նախօրեին Թբիլիսիում ջահերով երթ է տեղի ունեցել։ Այսօր հայկական եկեղեցում պատարագից հետո Թուրքիայի դեսպանատան մոտ տեղի կունենա ավանդական հանրահավաքը։