Apple-ի ղեկավար Թիմ Կուկը 2015 թվականին Uber-ի հիմնադիր Թրեւիս Կալանիկին սպառնացել էր App Store-ից հեռացնել նրա հավելվածը, քանի որ այն խախտել է iPhone-ի տերերի գաղտնիությունը: Այս մասին հայտնում է The New York Times-ը՝ վկայակոչելով աղբյուրներին:
Կուկը Կալանիկին իր գրասենյակ է հրավիրել, քանի որ տեղեկացել է, որ նա իր աշխատակիցներին հանձնարարել է հավելվածում սողանցք ստեղծել, որ App Store-ի մոդերատորները ի վիճակի չլինեն ֆիքսել Uber-ի հետեւելու գործիքները: Uber-ում պնդում են, որ օգտատերերին հետեւելու ծրագիրն օգտագործվել է հիմնականում չինացի տաքսիստների խարդախությունները կանխելու նպատակով:
Պարբերականը հայտնում է, որ գործիքը շարունակել է սմարթֆոնի տիրոջ գործողություններին հետեւել նույնիսկ Uber հավելվածը հեռացնելուց հետո:
Կուկի հետ հանդիպումից հետո Կալանիկը որոշել է ռիսկի չդիմել եւ ծրագիրը փակել է, քանի որ Uber-ի համար App Store-ից հեռացվելը կնշանակեր ամբողջ աշխարհում միլիոնավոր հաճախորդների կորուստ:
