Ստրասբուգի հայերն այսօր՝ ապրիլի 24-ին, բողոքի ակցիա կիրականացնեն Թուրքիայի հյուպատոսության դիմաց: NEWS.am-ի հետ զրույցում Ստրասբուրգի «Հայորդի» երիտասարդաց միության անդամ Համլետ Հովսեփյանը նշեց, որ բացի հյուպատոսարանի դիմաց բողոքի ակցիայից, նաեւ մտադիր են մի քանի րոպեով փակել Ստրասբուրգի կարեւոր փողոցներից մի քանիսը եւ ցեղասպանությունը դատապարտող կոչեր հնչեցնել:
«19:30 հավաքվում ենք Ստրասբուրգի կենտրոնական հրապարակներից մեկում, այնտեղից կշարժվենք դեպի Թուրքիայի հյուպատոսություն: Նախատեսել ենք ճանապարհներ փակել, մարդաշատ տարածքով ենք անցնելու եւ ցեղասպանությունները դատապարտող կոչեր ենք հնչեցնելու: Մեզ հետ տանելու ենք Հայոց ցեղասպանությունը, Հրանտ Դինքի սպանությունը դատապարտող պաստառներ: Այնուհետեւ Թուրքիայի դեսպանատան դիմաց բողոքի ակցիա կիրականացնենք, մեր բողոքի ձայնը կբարձրաձայնենք դեսպանատան դիմաց»,-ասաց նա:
Համլետ Հովսեփյանը նաեւ նշեց, որ բացի Թուրքիայի հյուպատոսության դիմաց բողոքի ակցիայից, Ստրասբուրգում այսօր Հայոց ցեղասպանության զոհերի հիշատակի հարգման այլ միջոցառումներ են իրականացվել:
