2014 թվականին Ռուսաստանի դեմ Եվրոպական միության կողմից սահմանված պատժամիջոցների հարցը շոշափվել է ՌԴ ԱԳՆ ղեկավար Սերգեյ Լավրովի եւ Արտաքին գործերի ու անվտանգության քաղաքականության ԵՄ գերագույն հանձնակատար Ֆեդերիկա Մոգերինիի հանդիպման ընթացքում։ Այս մասին ռուսական դիվանագիտական գերատեսչության ղեկավարը հայտարարել է բանակցություններն ամփոփող մամուլի ասուլիս ժամանանկ, հաղորդում է «ՏԱՍՍ»-ը։
«Ինչ վերաբերում է պատժամիջոցներին, ապա, այո, այդ հարցը շոշափվել է մեր զրույցում։ Մենք ինքներս այդ հարցը չենք քննարկում, քանի որ պատժամիջոցներն այն արհեստական խնդիրների մասն են, որոնք լարում են Եվրամիության հետ մեր հարաբերությունները»,-ասել է նախարարը։
«Ֆեդերիկան (Մոգերինին) այսօր շատ հետաքրքիր նրբություն ցուցաբերեց՝ ասելով, որ Եվրամիությունը կողմ է, որ Մինսկի համաձայնագրերը բոլորը կատարեն։ Ինչպես դուք հասկանում եք՝ դա ներառում է եւ Կիեւի կառավարությանը, եւ Դոնբասի՝ Դոնեցկի ու Լուգանսկի աշխարհազորայիններին եւ ներառում է Եվրամիությունը, որովհետեւ Գերմանիան ու Ֆրանսիան մեծ հաշվով գործել են Եվրամիության անունից, առավել եւս, որ այդ պայմանավորվածությունները հավանության են արժանացվել ՄԱԿ-ի Անվտանգության խորհրդի կողմից»։
«Բայց եթե այդ պայմանավորվածությունները պետք է կատարեն բոլորը, ապա, հավանաբար, Ռուսաստանի պարտականությունն է այնպես անել, որ Լուգանսկն ու Դոնեցկը, ում ստորագրություններն առկա են Մինսկի պայմանագրի ներքո, կառուցողական ու ամբողջությամբ կատարեն պարտականությունների իրենց մասը, իսկ Գերմանիան ու Ֆրանսիան պետք է ապահովեն, որ նույն բանն անի Ուկրաինայի կառավարությունը։ Մենք ձգտում ենք աշխատանքի մեր մասը կատարել բարեխճորեն, սակայն, դժբախտաբար Կիեւը խուսափում է ԴԺՀ-ի եւ ԼԺՀ-ի հետ անմիջական բանակցություններից՝ չնայած որ դա սեւ ու սպիտակով գրված է մինսկյան փաստաթղթերում»։
