Ներկայիս Թուրքիան չի կարող Եմ անդամ դառնալ: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում, NEWS.am-ի թղթակցի հետ զրույցում նշել է Եվրախորհրդարանի պատգամավոր Ֆրանկ Էնգելը:
Նրա խոսքով, Եվրախորհրդարանը հստակ հայտարարել է, որ Թուրքիայի ԵՄ անդամակցության բանակցությունները պետք է դադարեցվեն: «Մենք չպետք է հիմարի տեղ դնել մեզ ու թուրքերին: Չկա ճանապարհ, որով ներկայիս Թուրքիան կարող է ԵՄ անդամ երկիր դառնալ: Առաջիկա շաբաթ ԵՄ երկրների ԱԳ նախարարները գործընթաց կսկսեն, որը, վերջնարդյունքում, կհանգեցնի բանակցությունների դադարեցմանը: Ես չգիտեմ՝ ինչ կլինի 20 տարի հետո: Ես միշտ կողմ եմ եղել եվրոպական ընտանիքի նորմալ անդամ դառնալ ձգտող Թուրքիային, բայց ներկա պայմաններում դա անհնար է»,-ընդգծել է Էնգելը:
Հիշեցնենք, որ Թուրքիայի իշխանություններին հաջողվել է, օգտագործելով վարչական ռեսուրսը, որոշակի գյուղական շրջանների հաշվին, 2 տոկոս տարբերությամբ, ապրիլի 16-ին կայացած հանրաքվեով հասնել սահմանադրական փոփոխությունների, որով երկիրն անցնում է նախագահական կառավարման:
Միջազգային փորձագետների կարծիքով, դա հերթական քայլն էր, որով Թուրքիան ընթանում է դեպի էրդողանական բռնապետություն: Հանրաքվեն տեղի է ունեցել Էրդողանի քաղաքական հակառակորդների զանգվածային ձերբակալությունների ֆոնին: Այդուհանդերձ, սահմանադրական փոփոխությունների հակառակորդները, անգամ պաշտոնական տվյալներով, հաղթել են երկրի երեք խոշոր քաղաքներում՝ Անկարայում, Ստամբուլում եւ Իզմիրում:
