Աֆղանստանի բանտերում ու քննչական մեկուսարաններում բանտարկյալները առաջվա պես ենթարկվում են կտտանքների։ Այս պրակտիկան աննախադեպ ծավալների է հասել։ Այս մասին ասվում է ՄԱԿ-ի նոր զեկույցում։
Զեկույցը պատրաստել են Աֆղանստանում ՄԱԿ-ի առաքելությունն ու ՄԱԿ-ի մարդու իրավունքների հարցերով Գերագույն հանձնակատաի վարչությունը։ Այնտեղ ներկայացված են 469 բանտարկյալների հետ զրույցներից ստացված տեղեկություններ։
Բանտարկյալների ավելի քան մեկ երրորդը հայտնել է, որ դարձել է կտտանքների ու դաժան վարվեցողության զոհ։ ՄԱԿ աշխատակիցներին հաջողվել է զրուցել բանտերում գտնվող 85 երեխաների հետ։ Նրանցից 38-ը հայտնել են, որ կտտանքների են ենթարկվել այն բանտերում, որոնք աֆղանյան անվտանգության ուժերի վերահսկողության տակ են գտնվում։ Բանտարկյալների մեծ մասը հայտնել է, որ իրենց կտտանքների են ենթարկել, որպեսզի իրենք խոստովանեն իրենց վերագրվող այն հանցագործությունները։
«Կտտանքների արդյունքում ստացված խոստովանությունները հավաստի չեն կարող լինել։ Մարդիկ կասեն ցանկացած բան, միայն թե ցավը դադարի»,- նշել է ՄԱԿ գլխավոր իրավապաշտպան Զեյդ Ռաադ ալ Հուսեյնը։ Նա կոչ է արել վերջ տալ այդ անմարդկային պրակտիկային։