Հայոց ցեղասպանության 102-րդ տարելիցի առիթով հրապարակած ուղերձում ԱՄՆ նորընտիր նախագահ Դոնալդ Թրամփը, ինչպես եւ սպասվում էր, խուսափեց «Ցեղասպանություն» եզրույթից: Իր նախորդի՝ Բարաք Օբամայի նման նա նախապատվությունը տվել է «Մեծ եղեռն» եզրույթին: Նա խոսել է տեղահանությունների, կոտորածների ու մահվան քարավանների մասին՝ հավելելով, որ միանում է «Ամերիկայի հայկական համայնքին եւ աշխարհասփյուռ հայությանը՝ սգալու կորսված մարդկային անմեղ կյանքերի ու կրած բազում տառապանքների վիշտը»:
Իսկ Երեւանում վաղ առավոտից հարյուրավոր հազարավոր մարդիկ բարձրանում էին Ծիծեռնակաբերդի բարձունք: Ավանդույթի համաձայն, առավոտյան ցեղասպանության զոհերի հուշահամալիրում են եղել երկրի բարձրաստիճան պետական այրերը՝ նախագահ Սերժ Սարգսյանի գլխավորությամբ: Գարեգին 2-րդ Ամենայն հայոց կաթողիկոսն անմար կրակի մոտ հոգեհանգստի կարգ է կատարել:
Մինչ այդ, նախագահը երեկ «Մոսկվա» կինոթատրոնում մասնակցել է Հայոց ցեղասպանության մասին «Խոստում» ֆիլմի փակ դիտմանը: Ժապավենի համաշխարհային պրեմիերան կայացել է ապրիլի 21-ին, երեւանյան պրեմիերան նախանշված է ապրիլի 27-ին: Երկար սպասված ու արդեն մեծ աղմուկ հանած ֆիլմը ստեղծել են Քըրք Քըրքորյանի «Survival Pictures» ընկերությունն ու օսկարակիր ռեժիսոր Թերրի Ջորջը: Գլխավոր դերերում հադես են եկել Օսկար Այզեքը, Շարլոթ լը Բոնը, Քրիստիան Բեյլը:
Այսօր հայտնի են դարձել նաեւ «Ավրորա» մրցանակաբաշխության 2017 թվականի մրցանակի 5 հավակնորդների անունները: Նրանք են՝ մայր եւ դուստր Ֆարթուն Ադանը եւ Իլվադ Էլմանը, Ջամիլիա Աֆղանին, որը զբաղվում է Աֆղանստանում կանանց իրավունքների պաշտպանությամբ, սիրիացի 26-ամյա բժիշկ Մուհամմադ Դարվիշը, Կոնգոյից Դենիս Մուքվեբեն եւ Թոմ Կատինան՝ ամերիկացի բժիշկ, որը Սուդանում է աշխատում:
Մրցանակի հավակնորդների թվում են եղել նաեւ «Հաց բերող» Արթուր Սարգսյանը եւ բժիշկ Լիզան: Սակայն, մրցանակաբաշխութան համահիմնադիր Ռուբեն Վարդանյանի խոսքով, «Ավրորա-2017»-ի մրցանակակիրների եզրափակիչ ցանկում չեն ներառվել, քանի որ, դժբախտաբար, ողջ չեն: Ռուբեն Վարդանյանն իր ելույթում խոսել է Հայաստանի եւ Սփյուռքի ներուժի միավորման անհրաժեշտության մասին. համոզված է, որ այդ դեպքում Հայաստանը չքնաղ երկիր կդառնա: Իսկ Հայաստանի զարգացմանն օգնելու համար, ըստ Վարդանյանի, պարտադիր չէ կառավարության կազմում լինել կամ որեւէ այլ պաշտոն զբաղեցնել:
Հայոց ցեղասպանության 102-րդ տարելիցի առիթով միջոցառումներ են կազմակերպվել աշխարհի բազմաթիվ երկրներում: Ստամբուլում սգո արարողություններից մեկն էլ անցկացվել է 2011 թվականի ապրիլի 24-ին ծառայակցի կողմից սպանված Սեւակ Շահին Բալըքչըի շիրմի մոտ: Գերեզամանատուն են այցելել ինչպես հայ համայնքի ներկայացուցիչներ, այնպես էլ քուրդ եւ թուրք գործիչներ:
Իսկ Երեւանում Ցեղասպանության 102-րդ տարելիցի միջոցառումները հետին պլան էին մղել մայրաքաղաքի քաղաքական կյանքի կարեւոր իրադարձությունը՝ ավագանու ընտրությունների քարոզարշավը: Ընտրություններին մասնակցող ուժերը Ծիծեռնակաբերդ են այցելել, նաեւ պատասխանել լրագրողների հարցերին:
Բազմաթիվ հարցեր բաց են մնացել դեռեւս խորհրդարանական ընտրություններից հետո: Օգտվելով առիթից՝ լրագրողները մի քանի հարցերի պատասխան փորձել են ստանալ Ծիծեռնակաբերդ այցելած գործիչներից: Շատերին է հետաքրքրում, արդյո՞ք իրականություն կդառնա նախընտրական քարոզչության ժամանակ Գագիկ Ծառուկյանի հայտարարած 15 մլրդ դոլարի ներդրումը: Ծառուկյանն ասել է, որ ներդրումները կարվեին, եթե իր գլխավորած դաշինքը խորհրդարանում մեծամասնություն ունենար:
Ընտրություններում, ամեն դեպքում, «Ծառուկյան» դաշինքը տպավորիչ հաղթանակ տարավ, եւ այս ուժի հետ խորհրդարան մտավ նաեւ նախկին վարչապետի որդին: Հովիկ Աբրահամյանին այսօր հարցրել են. հնարավո՞ր է՝ ինքն էլ ԲՀԿ-ի շարքերը համալրի: Աբրահամյանը վստահեցրել է, որ չի լքել Հանրապետական կուսակցությունը:
Հավելենք, որ երեկ անցկացվել է նաեւ ավանդական ջահերով երթը: Երթի մասնակիցները ջահերով եւ Հայոց ցեղասպանությունը ճանաչած երկրների դրոշներով Ազատության հրապարակից շարժվել են դեպի Ծիծեռնակաբերդ, որտեղ գիշերը նաեւ հսկման կարգ է կատարվել:
Ապրիլի 23-ին Ֆրանսիայում կայացավ նախագահական ընտրությունների առաջին փուլը: Քվեարկության արդյունքներով՝ «Առաջ» շարժման առաջնորդ Էմանուել Մակրոնը ստացել է 23.86%, «Ազգային ճակատի» առաջնորդ Մարին Լը Պենը՝ 21.43% ձայն: Նրանք էլ կշարունակեն պայքարը մայիսի 7-ին նախանշված երկրորդ փուլում: Եթե վստահենք սոցիոլոգիական վերջին հարցման արդյունքներին, կհաղթի Էմանուել Մակրոնը: Դրանց համաձայն՝ էկոնոմիկայի նախկին նախարարը մրցակցին կհաղթի 62%-38% հարաբերակցությամբ:
Նախընտրական քարոզչության ընթացքում գրեթե բոլոր թեկնածուներն անդրադարձել են Ֆրանսիայի հայ համայնքի խնդիրներին ու պահանջներին: Մարին Լը Պենը շեշտադրում էր, որ իր ղեկավարած քաղաքական ուժը դեմ է Եվրամիությանը Թուրքիայի անդամակցությանը, Էմանուել Մակրոնն էլ խոսում էր Ցեղասպանության ժխտման քրեականացման անհրաժեշտության մասին: Ֆրանսիայի հայերը, սակայն, հակված են սատարել Մակրոնին. կարծում են, որ երկրորդ փուլ անցած թեկնածուներից հենց նա ավելի հայամետ քաղաքականություն կարող է վարել: Ի դեպ՝ այսօր Էմանուել Մակրոնը Փարիզում մասնակցել է Հայոց ցեղասպանության 102-րդ տարելիցի առիթով հայ համայնքի կազմակերպած միջոցառմանը:
Իսկ մամուլում հրապարակումներ են հայտնվում հիմնական մրցակիցների անձնական կյանքի մասին: Էմանուել Մակրոնն ամուսնացած է իրենից 23 տարով մեծ Բրիջիթ Մակրոնի հետ: Բրիջիթն Էմանուելի դպրոցական ուսուցչուհին է եղել, որին Մակրոնը սիրահարվել է դեռ 15 տարեկանում: Զույգն ամուսնացել է 2007 թվականին: Նրանք համատեղ երեխաներ չունեն, բայց Էմանուել Մակրոնը լավ հարաբերություններ ունի կնոջ 3 երեխաների եւ 6 թոռների հետ: Մարին Լը Պենի կյանքի ուղեկիցն իր գլխավորած «Ազգային ճակատ» կուսակցության փոխնախագահ Լուի Ալիոն է: Ի դեպ՝ հետաքրքիր փաստ Լը Պենի քաղաքական կյանքից. նա 18 տարեկանում անդամակցել է հոր՝ Ժան-Մարի Լը Պենի «Ազգային ճակատ» կուսակցությանն ու հետագայում հորը վտարել իր իսկ ստեղծած կուսակցությունից: Դրանից հետ Ժան-Մարի Լը Պենը հայտարարել է, որ ամաչում է, որ «դուստրն իր ազգանունն է կրում»:
Եվրախորհրդի Խորհրդարանական վեհաժողովում սկանդալ է հասունանում: Վեհաժողովում ուկրաինական պատվիրակությունը պահանջում է ԵԽԽՎ գործող նախագահ Պեդրո Ագրամունտի հրաժարականը: Պատճառն այն է, որ Ագրամունտը ռուսական պատվիրակության ուղեկցությամբ Սիրիա է մեկնել: Ագրամունտն արդեն հայտարարել է, որ Սիրիա իր այցելությունը սխալ էր եւ ներողություն խնդրել, բայց դա չի փրկել իրավիճակը: Ելույթից անմիջապես հետո նրա հրաժարականն են պահանջել: Նշենք, որ Պեդրո Ագրամունտը հայտնի է ընդգծված ադրբեջանամետ դիրքորոշմամբ: Նրա անունը կապում են նաեւ եվրոպական կառույցում Ադրբեջանի մասնակցությամբ մի շարք կոռուպցիոն սկանդալների հետ:
Գյումրիի 102-րդ ռուսական ռազմաբազայի պայմանագրային զինծառայող, 21-ամյա Դմիտրի Յալպաեւի սպանության գործով ձերբակալված կա՝ 20-ամյա Արման Ջանջուղազյանը: Նա տեղափոխվել է Երեւան, քանի որ սպանության գործը քննելու է Երեւանի քննչական կոմիտեի գլխավոր վարչությունը: Վաղը լրանալու է նրա ձերբակալության 72 ժամը, որից հետո կորոշվի նրա կալանքի կամ ազատ արձակման հարցը: Պաշտպան Արամայիս Հայրապետյանի տեղեկացմամբ՝ Ջանջուղազյանը Ստեփանավանի բնակիչ է, Գյումրի է գնացել հենց սպանության օրը: Ըստ տեղեկությունների՝ 20-ամյա երիտասարդը հոգեկան առողջության հետ կապված խնդիրներ ունի, ժամկետային ծառայություն անցնելիս մի քանի անգամ ինքնավնասման փորձ է արել: Մի շարք փորձաքննություններ են նշանակվել:
Ապրիլի 24-ին դոլարի փոխարժեքը կազմել է 483 դրամ, եվրոյինը՝ 513, ռուբլունը՝ 8 դրամ 50 լումա, ֆունտինը՝ 612 դրամ:
Ապրիլի 25-ին Լոռիում, Տավուշում եւ Սյունիքում սպասվում է կարճատեւ անձրեւ եւ ամպրոպ: Օդի ջերմաստիճանը 6-8 աստիճանով կնվազի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +7+9, ցերեկը՝ +19+21 աստիճան տաքություն: