Եմենում յուրաքանչյուր 10 րոպեն մեկ մինչեւ 5 տարեկան մի երեխա է մահանում այնպիսի պատճառների հետեւանքով, որոնք հնարավոր էր կանխել:
ՄԱԿ-ի տվյալներով՝ Եմենի բնակչությունը սովահարության եզրին է: Շուրջ 19 մլն մարդ՝ բնակչության ավելի քան երկու երրորդը, մարդասիրական օգնության կարիք ունի: Նրանցից 7 միլիոնն արդեն սովի է մատնված:
Եմենում զինված հակամարտության մեկնարկից երկու տարի անց երկիրն ավերակների է վերածվել, միլիոնավոր մարդիկ հարկադրված են եղել լքել իրենց տները, հազարավորները սպանվել են: Ավելի քան 8 մլն մարդ մաքուր խմելու ջուր չունի, չի կարողանում օգտվել սանիտարական ոլորտում ծառայություններից: Եմենում գրեթե ամբողջությամբ քայքայվել է առողջապահական համակարգը, ինչը հանգեցնում է մայրական եւ մանկական մահացության աճի:
ՄԱԿ-ը դոնորներից 2.1 մլրդ դոլար է խնդրել՝ Եմենի 12 մլն բնակչության համար կենսական անհրաժեշտության օգնություն ցուցաբերելու նպատակով: Սակայն մինչեւ հիմա այդ գումարի միայն 15%-ն է հատկացվել: