«Կոնգրես-ՀԺԿ» դաշինքի իրավաբան Տիգրան Եգորյանը Սահմանադրական դատարան է ներկայացրել ընտրությունների ընթացքում խախտումների մասին տվյալները:
Հիշեցնենք, որ ՍԴ-ն քննում է «Կոնգրես-ՀԺԿ» դաշինքի հայցը, որով բողոքարկվում են ապիրիլի 2-ին կայացած խորհրդարանական ընտրությունների արդյունքները: Որպես պատասխանող հանդես է գալիս Կենտրոնական ընտրական հանձնաժողովը, համապատասխանող՝ դատախազությունը եւ ոստիկանությունը:
Տիգրան Եգորյանն ընդարձակ ելույթով ներկայացրել է բազմաթիվ խախտումները, որոնք գրանցվել են նախընտրական արշավի եւ անմիջաբար քվեարկության ժամանակ:
Եգորյանը ներկայացրել է ընտրողների կաշառքի, նրանց նկատմամբ ճնշում գործադրելու, նախընտրական խոստումների, ընտրողներին «ուղղորդելու» տվյալներ: Ըստ որում՝ խախտումներ են կատարել նաեւ մյուս կուսակցությունները, սակայն «առաջատարը» Հայաստանի Հանրապետական կուսակցությունն է:
Փաստաբանը թվարկել է խախտումների վերաբերյալ մամուլի հրապարակումները, նաեւ մանրամասն անդրադարձել է պաշտոնական տվյալներին, որոնք իրավապահ մարմինների կողմից տարբեր ժամերի հապարակվել են:
Նա ներկայացրել է նաեւ դիտորդների նշած խախատումների մասին տվյալներ: Խախտումների մեծ մասը վերաբերում է ընտրողներին «ուղղորդելուն»:
Գրեթե 2 ժամ ելույթը լսելուց հետո ՍԴ նախագահ Գագիկ Հարությունյանը հիշեցրել է, որ ընտրություններին մասնակցել է մի քանի հազար դիտորդ, եւ յուրաքանչյուրին առանձին-առանձին լսելը դատարանի համար խնդրահարույց է: Դատավորի եզրակացությունների հետ համաձայնելով՝ Տիգրան Եգորյանը նշել է, որ եթե դատարանն ավելի նպատակահարմար է համարում, ինքը տեղեկություններն ավելի սեղմ կներկայացնի:
Փաստաբանն այնուհետեւ անդրադարձել է ընտրական տեղամասերում քարոզչության խնդրին՝ հայտնելով 25 տեղամասերում 26 դեպքի մասին:
Հաջորդ ժամվա ընթացքում Եգորյանը խոսել է խախտումների մասին՝ կապված քվեախցիկների սխալ տեղադրության հետ, որով խախտվել է քվեարկության գաղտնիությունը, տեղամասերի առջեւ ընտրողների կուտակումների մասին, խախտումների եւ ընդհատումների մասին՝ կապված ընտրողների էլեկտրոնային գրանցման հետ, անունների եւ ստորագրությունների անհամապատասխանության մասին: