«Ելքի» ներկայացուցիչ Ալեն Սիմոնյանի խոսքերով, մեծամասնություն կազմելու դեպքում իրենք նախեւառաջ փորձելու են լուծել Երեւանի տրանսպորտային խնդիրները:
«Երեւանի տրանսպորտով տեղաշարժվում են միջին խավի մարդիկ, ու տեղաշարժվում են պպզած, կուզիկ վիճակում, այս վիճակին պետք է վերջ տալ: Այս մասին, այսօր՝ ապրիլի 25-ին, լրագրողների հետ հանդիպման ժամանակ նշել է Երեւանի ավագանու «Ելք» դաշինքի թեկնածու Ալեն Սիմոնյանը՝ հավելելով, որ իրենց հաղթանակի դեպքում լուծելու են այդ խնդիրը:
Նա անդրադարձավ Երեւանում մետրոյի նոր կայարան կառուցելուն՝ նշելով. «Հավատացեք, ճիշտ կառավարման դեպքում ոչ թե 1, այլ եւս մի քանի կայարան կարելի է կառուցել: Եթե այսօր ամենահարուստ մարդիկ պաշտոնյաներն են, նշանակում է այդ փողը կա, այդ փողը ինչ-որ տեղից գոյանում է: Հարց է ծագում, ինչու են Հայաստանում պետական պաշտոնյաներն ամենահարուստը, ոչ թե գործարարները»:
Ալեն Սիմոնյանի դիտարկմամբ, եթե Տարոն Մարգարյանը ցանկություն ունենար, ապա Փակ շուկան չէր քանդվի. «Թե չկարողացավ, թե չուզեց, թե մասնակից էր այդ ամենին, սակայն աՓակ շուկան քանդվեց»:
«Ելք»-ի թեկնածուն ընդգծեց, որ իրենք մտադիր են նաեւ վերացնել քաղաքում տեղադրված արագաչափերը: «Երեւանի քաղաքապետարանը կարող է չհատկացնել տարածքներ այդ արագաչափերը տեղադրելու համար ու չի հատկացնի մեր հաղթելու պարագայում: Տեսախցիկները կարող են ծառայել ոստիկանությանը՝ որպեսզի նրանք բացահայտեն հանցագործությունները, բայց այդ տեսախցիկները ծառայում են Երեւանում տեղաշարժվող մարդկանց եւ երեւանցիներին թալանելուն: Եթե դուք ուսումնասիրեք կտեսնեք, որ օրինակ տաքսու վարորդները մի քանի մլն դրամի չմարած տուգանքներ ունեն»:
