Կառավարության մոտ բողոքի ակցիա իրականացնող «Առինջ մոլ», «Փեթակ», «Սուրմալու» առեւտրի կենտրոնների աշխատակիցների եւ կառավարության ներկայացուցիչների հանդիպումն ավարտվել է։
Ինչպես հաղորդում է NEWS.am–ի թղթակիցը, կառավարությունից խոստացել են հաշվի առնել առեւտրով զբաղվողների առաջարկները եւ դրանց ընթացք տալ ՀՀ օրենքների սահմաններում։
«Մեզ ասացին, որ կազմվելու է հանձնախումբ՝ իրավաբաններից տնտեսագետներից եւ տոնավաճառների աշխատակիցների աառաջարկները քննարկվելու են եւ համապատասխանեցվելու են ՀՀ օրենքներին»,– լրագրողների հետ զրույցում ասել է հանդիպման ներկա ցուցարարներից մեկը։
Ցուցարարների հետ հանդիպել են պետական եկամուտների կոմիտեի նախագահի տեղակալ Վախթանգ Միրումյանը եւ ՊԵԿ օպերատիվ հետախուզության վարչության ղեկավար Գարեգին Առաքելյանը։ Նրանք խոստացել են, որ մինչեւ ցուցարարների առաջարկների վերջնական լուծումը, ստուգումներ չեն անցկացնի տոնավաճառներում, իսկ աշխատակիցները կշարունակեն աշխատել ինչպես նախկինում՝ 3 տոկոս շրջանառության հարկ վճարելով եւ առանց փաստաթղթերի։
Հիւշեցնենք, որ կառավարությունը պահանջում է, որ նրանք փաստաթղթավորված աշխատեն, այսինքն՝ յուրաքանչյուր ապրանքի վաճառքի վերաբերյալ ներկայացնեն փաստաթուղթ, ինչին դեմ են առեւտրականները, նրանք պահանջում են, որ կառավարությունը սահմանի հաստատագրված վճար։