Երեւանի Շենգավիթ վարչական շրջանում այսօր՝ ապրիլի 25-ին, Երեւանի քաղաքապետ, քաղաքապետի թեկնածու Տարոն Մարգարյանի հետ հանդիպմանը եկել էին սոցիալական ծանր վիճակում ապրող մեծ թվով քաղաքացիներ: Տարոն Մարգարյանի ելույթից հետո նրանք բարձրացան բեմահարթակ, նրա հետ խոսելու, իրենց նամակները քաղաքապետին փոխանցելու համար: Տարոն Մարգարյանին մոտեցած տարեց կանանցից մեկն էլ քաղաքապետին մոտենալուն պես գոռաց՝ «Եկել եմ մոտիկից երեսդ տեսնելու, Տարոն ջան»,-որից հետո գրկախառնվեց եւ համբուրեց Տարոն Մարգարյանին: Լրագրողի հարցին, թե ինչ խոստումներ է տալիս բնակիչներին, Տարոն Մարգարյանը նշեց, որ ծրագրային դրույթներն է ներկայացնում բնակիչներին:
Քաղաքապետի հետ հանդիպմանը ներկա էր նաեւ «Նաիրիտ» գործարանի նախկին աշխատակիցներից մեկը, որը հանդիպմանը եկել էր «Նաիրիտը իմ տունն է» գրությամբ պաստառով: Նա մոտենալով Տարոն Մարգարյանին՝ բարձրաձայնեց գործարանի վերագործարկման հարցը:
Նշենք, որ այսօր քաղաքապետը նախընտրեց շփվել բնակիչների հետ, իսկ լրագրողների հարցերը թողեց անպատասխան, նշելով. «Հարգելի լրագրողներ ջան, ես 3 օր տրամադրել եմ ձեզ, պատասխանել ձեր հարցերին, թողեք անեմ իմ քարոզարշավը, շփվեմ բնակիչների հետ»:
Հիշեցնենք, որ Երեւանի ավագանու ընտրությունները տեղի կունենա մայիսի 14-ին, ընտրություններին մասնակցում է Հայաստանի հանրապետական կուսակցությունը, «Երկիր Ծիրանին» եւ «Ելք» դաշինքը:
