Ցեղասպանությունն իր հետքն է թողել յուրաքանչյուր հայկական ընտանիքում։ 35-ամյա ֆուտբոլիստ Սաքո Էսկիջյանը Բեյրութում է ծնվել։
«Իմ նախնիները կոտորածի ժամանակ Ադանայից Լիբանան են արտագաղթել։ Ես Բեյրութում հայկական դպրոց եմ ավարտել։ Լիբանանում ես շատ լավ ուսումնասիրել եմ հայկական պատմությունն ու մշակույթը, այն ամենը, ինչ կապակցված է հայ ժողովրդի հետ»,- պատմում է Սաքոն։
Նա Հայաստան է ժամանել հայկական թիմի հետ մարզվելու։ Ու չնայած արդեն հասցրել է ոտքի վնասվածք ստանալ՝ ապրիլի 25-ին ֆուտբոլիստը բարձրացել էր Ծիծեռնակաբերդ հուշահամալիր՝ իր հարգանքի տուրքը մատուցելու Ցեղասպանության զոհերի հիշատակին։
«Ես շատ եմ սիրում Հայաստանը։ Շատ եմ ուզում ապրել այստեղ։ Առայժմ պայմանները թույլ չեն տալիս։ Բայց մենք հույս ունենք, որ բոլոր սփյուռքահայերը մի օր կվերադառնան հայրենիք»,- ժպտալով ասում է Սաքոն։
Հայերի կոտորածների մասին նրան պատմել են տատիկները, պապիկներին նա շատ շուտ է կորցրել։
«Մենք հույս ունենք, որ Հայոց ցեղասպանությունից 102 տարի անց թուրքական կառավարությունը կճանաչի այն ու կվերադարձնի մեր հողերը։ Մենք ընդամենն ուզում ենք վերադարձնել մեր հողերը, որպեսզի նորից ունենանք միասնական Հայաստան, որպեսզի Արեւմտյան Հայաստանը վերամիավորվի Արեւելյան Հայաստանի հետ։ Մենք հույս ունենք, որ կունենանք նման Հայաստան»,- վստահաբար հավելում է Սաքո Էսկինջյանը։