Արցախում ժամկետային զինծառայող է զոհվել: Հակառակորդի արձակած կրակոցից մահացու հրազենային վիրավորում է ստացել կրտսեր սերժանտ Նարեկ Հմայակի Հարությունյանը: Պաշտպանության բանակի 20-ամյա զինծառայողը մահացու վիրավորում է ստացել գլխի շրջանում:
Նարեկ Հարությունյանը Շիրակի մարզի Լեռնուտ գյուղից էր, երկու ամիս անց զորացրվելու էր: Նարեկն ընտանիքի միակ որդին էր, մեկ քույր ունի: Հայրը երրորդ կարգի հաշմանդամ է: Ծնողները գյուղատնտեսական աշխատանքներով են զբաղվում: Լեռնուտի գյուղապետը պատմել է, որ դպրոցն ավարտելուց հետո տղան բանակ է զորակոչվել, մտադիր էր զորացրվելուց հետո կրթություն ստանալ: Արցախի նախագահի հրամանագրով՝ Նարեկ Հարությունյանը հետմահու պարգեւատրվել է «Մարտական ծառայություն» մեդալով:
Արցախի պաշտպանության բանակի հյուսիսային ուղղությամբ տեղակայված զորամասերից մեկի պահպանության տեղամասում էլ, դեռեւս չպարզված հանգամանքներում, մահացու վիրավորում է ստացել 1998 թվականին ծնված զինծառայող Կարեն Արմենի Ավետիսյանը: Քննչական կոմիտեի տեղեկացմամբ՝ Ավետիսյանի դին հայտնաբերել են ծնոտի շրջանում մահացու հրազենային վնասվածքով: Նախնական տվյալներով՝ Կարեն Ավետիսյանն ինքն է իրեն վնասվածք հասցրել՝ իրեն ամրակցված գնդացրով:
Սահմանադրական դատարանն այսօր սկսել է քննել «Կոնգրես-ՀԺԿ»-ի ներկայացրած հայցը, որով դաշինքը պահանջում է անվավեր ճանաչել խորհրդարանական ընտրությունների արդյունքները: Լեւոն Զուրաբյանի բնորոշմամբ՝ ապրիլի 2-ի քվեարկությունը ժողովրդի կամքի զանգվածային խեղաթյուրում էր: 2012 թվականին նույնպես ՍԴ եկած Զուրաբյանն այսօր «դեժավյուի» զգացողություն է ունեցել: Շարունակական ընտրակեղծիքների, ապարդյուն բողոքարկումների մասին Լեւոն Զուրաբյանի ելույթը Սահմանադրական դատարանի նախագահն ընդհատել է. խորհրդարանում չեք, քաղաքական ելույթ մի ունեցեք: Գագիկ Հարությունյանը հորդորել է փաստերով խոսել, Զուրաբյանն էլ փաստել է. տարակուսում է, թե լռության ուխտ արած պատգամավորներն ինչպես են մեծ թվով ձայներով նորից խորհրդարան անցել:
Հարթ չի անցել նաեւ տեսանյութերի հարցի քննարկումը: Այս անգամ էլ Լեւոն Զուրաբյանը վիճաբանել է պատասխանող կողմի ներկայացուցչի՝ ԿԸՀ նախագահ Տիգրան Մուկուչյանի հետ: Գագիկ Հարությունյանը շտապել է հաշտեցնել կողմերին. «Եկեք առանց պիտակավորումների, կարող եմ զրկել խոսքի իրավունքից»:
Դաշինքի իրավաբան Տիգրան Եգորյանը ներկայացված փաստերին հավելյալ նյութեր կցելու միջնորդություն է ներկայացրել: Մինչեւ վաղը ժամը 12-ը Սահմանադրական դատարանը պետք է ծանոթանա նյութերին, ինչից հետո էլ կշարունակվի նիստը:
Մինչ վիճարկում են խորհրդարանական ընտրությունների արդյունքները, քաղաքական ուժերը շարունակում են Երեւանի ավագանու ընտրությունների քարոզարշավը: Նիկոլ Փաշինյանի մոտ նախորդ ընտրարշավի հնարքների տպավորությունը, կարծես, դեռ թարմ է: Այսօր էլ ավտոտնակներ է տեսել, գայթակղվել ու նորից դրանց տանիք բարձրացել: Դաշինքի անդամները երեւանցիներին հորդորել են չհուսահատվել. «Ելք» կա: Ընտրարշավը մետրոյում սկսած Նիկոլ Փաշինյանը համախոհների հետ այսօր էլ ավտոբուսներին է անցել: Նոր Նորքում «Ելք»-ի ներկայացուցիչները թիվ 22 երթուղու ավտոբուս են նստել՝ քարոզչությունը համեմելով Երեւանի օրհներգի կատարմամբ:
Հանրապետական կուսակցության քաղաքապետի թեկնածու Տարոն Մարգարյանն էլ այսօր Շենգավիթում էր: Ինչպես նախորդ հանդիպումներում՝ այս անգամ էլ խոսել է իր պաշտոնավարման տարիներին արված աշխատանքի ու կիսատ թողածը շարունակելու ցանկության մասին:
Մի քանի տոնավաճառների առեւտրականներ այսօր կրկին կառավարության շենքի մոտ էին: Նախորդ ցույցի ժամանակ վարչապետի օգնականի հետ էին հանդիպել, այսօր էլ եկել էին՝ ձեւակերպված պահանջներն ու առաջարկները ներկայացնելու: Առեւտրականները դժգոհում են ապրանքների փաստաթղթավորման պահանջի դեմ ու առաջարկում «մեկ պատուհանի» սկզբունքը ներդնել՝ հարկերը գանձելով հենց սահմանին, ապրանքների մաքսազերծման ժամանակ:
Այսօր էլ ցուցարարների ներկայացուցիչները հանդիպել են պետեկամուտների կոմիտեի պաշտոնյաների հետ: Վերջինները խոստացել են քննարկել առաջարկներն ու օրենքի շրջանակում լուծում գտնել: Մինչ այդ, հարկային տեսուչները նրանց չեն անհանգստացնի: Նշենք, որ կառավարությունը փաստաթղթավորված աշխատանք է պահանջում: Դա նշանակում է, որ յուրաքանչյուր ապրանքի վաճառքի մասին պետք է փաստաթուղթ ներկայացնել, ինչին առեւտրականները դեմ են: Նրանք հաստատագրված վճարի սահմանում են պահանջում:
«Հաց բերողի» հարազատներն ու ընկերներն այսօր՝ նրա մահվան 40-րդ օրը, Արթուր Սարգսյանի շիրմին են այցելել: Հարազատներն իրենց հետ «Հաց բերողի» դեմ ոճրագործության 40-րդ օրը» գրությամբ պաստառ էին բերել: Հիշում են. բազմաթիվ ցանկություններ ուներ, սիրում էր երեխաների հետ պարապել, նրանց քննությունների նախապատրաստել: Արցախյան պատերազմին մասնակցած Արթուր Սարգսյանի երազանքն էր, որ իրեն «Եռաբլուր»-ում հողին հանձնեն: Երբեմն գնում էր «Եռաբլուր», նստում զինակից ընկերների շիրիմների կողքին ու խոսում նրանց հետ: Հիմա էլ ընկերները հույս ունեն, որ մի օր նրա աճյունը կվերահուղարկավորեն զինվորական պանթեոնում:
Հիշեցնենք, որ «Սասնա ծռերին» օժանդակելու մեջ մեղադրվող Արթուր Սարգսյանը մահացել է մարտի 16-ին, հիվանդանոցում: Անցյալ տարվա ամռանը ոստիկանության Երեւանի ՊՊԾ գնդի տարածքը գրավելու օրերին նա կրակահերթերի տակ մեքենայով ճեղքել էր ոստիկանական պատնեշն ու սնունդ տարել «Սասնա ծռեր»-ի անդամներին:
Որպես անհետ կորած որոնվողին ծառից կախված են գտել: Աբովյան քաղաքի Էլարի գերեզմանատանը՝ Սուրբ Ստեփանոս եկեղեցու մոտակայքում, ծառից կախված տղամարդու դի են հայտնաբերել: Քննչական կոմիտեի տեղեկացմամբ՝ դիակի արտաքին զննությամբ բռնության հետքեր չեն հայտնաբերվել: Մահացածի ինքնությունը պարզվել է. նա Երեւանի 31-ամյա բնակիչ է, որին իրավապահները որոնում էին որպես անհետ կորածի:
Ապրիլի 25-ին դոլարն էժանացել է, եվրոն՝ կտրուկ թանկացել: Արդյունքում դոլարի փոխարժեքն այսօր կազմել է 484 դրամ, եվրոյինը՝ 527, ռուբլունը՝ 8 դրամ 65 լումա, ֆունտինը՝ 620 դրամ:
Ապրիլի 26-ին հանրապետությունում սպասվում է առանց տեղումների եղանակ: Օդի ջերմաստիճանն ապրիլի 27-30-ը 5-7 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +1+3, ցերեկը՝ +19+21 աստիճան տաքություն: