2015 թվականի հունվարին Charlie Hebdo երգիծական ամսագրի խմբագրության եւ սուպերմարկետի վրա հարձակման գործի հետաքննության շրջանակում Ֆրանսիայում եւ Բելգիայում 10 մարդ է ձերբակալվել: Այս մասին գրում է ՌԻԱ Նովոստին՝ վկայակոչելով BFMTV-ն:
Հեռուստաալիքի տվյալներով՝ ձերբակալվածներին կասկածում են Փարիզը ցնցած ահաբեկչությունների կազմակերպիչներից Ամեդի Կուլիբալիին զենք մատակարարելու մեջ:
2015 թվականի հունվարի սկզբին զինված տղամարդը ներխուժել էր Փարիզի սուպերմարկետներից մեկը, կրակ բացել մարդկանց ուղղությամբ ու գերեվարել ներսում գտնվողներին: Նա 32-ամյա Ամեդի Կուլիբալին էր, որը սպանվեց հատուկ ջոկատայինների գործողության ժամանակ: Հարձակման արդյունքում 4 մարդ զոհվեց, 15 գերիներին հաջողվեց փրկել:
Իսկ ահաբեկչությունների շարքը Փարիզում սկսվեց հունվարի 7-ին Charlie Hebdo ամսագրի խմբագրության վրա հարձակմամբ, որը Մուհամեդ մարգարեի ծաղրանկարն էր հրապարակել: Երեք օրվա ընթացքում 17 մարդ զոհվեց, այդ թվում՝ 3 ոստիկան: