Հայաստանում ցանցահենության մակարդակը նվազում է, բայց շատ դանդաղ։ Այս մասին NEWS.am-ի թղթակցի հետ հարցազրույցում հայտնել է «Microsoft» ընկերության Եվրոպայի, Մերձավոր Արեւելքի եւ Աֆրիկայի մտավոր սեփականության բաժնի ղեկավար Լորան Սինյորեն, ով մասնակցել է Երեւանում մտավոր սեփականության պաշտպանության քննարկումներին։ Քննարկման կազմակերպիչներն են «Microsoft Armenia»-ն ու Հայ-ամերիկյան առեւտրի պալատը։
Նա նշել է, որ 2017 թվականի մարտին Երեւանում ընկերությունն արձանագրել է հարձակման 3 խոշոր աղբյուր՝ 5-6 հազար ip-հասցեներով։ «Մենք չգիտենք, թե դրանք ինչպիսի օգտատերեր են կամ ինչպիսի սարքավորումներ՝ համակարգիչներ, պլանշետներ կամ հեռախոսներ։ Իհարկե թիվը կարող է այնքան էլ մեծ չլինել, բայց դա միայն Երեւանի համար է եւ միայն մեկ ամսվա ընթացքում»,-նշել է Սինյորեն։
Նա հավելել է, որ այդ տվյալներն ընկերությունը ազատորեն ներկայացնում է բոլոր պետական կազմակերպություններին, որպեսզի նրանց օգնի տեղեկատվական անվտանգության քաղաքականության հետ կապված։
«Հարձակումներն ավելի շատ վնասում են չարտոնագրված սոֆթի օգտատերերին։ Իսկ Հայաստանում, դժբախտաբար, դրա օգտագործման տոկոսը հասնում է 86-ի։ 10 տարի առաջ այդ թիվն 90-95 տոկոս էր, եւ այդ գործընթացը նվազում է շատ դանդաղ, եթե համեմատենք Ռուսաստանի կամ Արեւելյան Եվրոպայի երկրների հետ, - նշել է «Microsoft»-ի ներկայացուցիչը։
Լորան Սինյորեն ուշադրություն է դարձրել, որ սոֆթի վրա պետք է ծախսել համակարգչի ու կապի ծախսերի առնվազն 10-15 տոկոսը։ Բայց նույնիսկ այդ հարաբերականորեն ոչ մեծ գումարները ոչ ոք չի ցանկանում վճարել։
