Արցախի մարտական դիրքերից մեկում ապրիլի 25-ին մահացած հայտնաբերված 19-ամյա զինծառայող Կարեն Ավետիսյանի ինքնասպանության վարկածին հարազատները չեն հավատում։ Այս մասին այսօր՝ ապրիլի 26-ին, NEWS.am-ի հետ զրույցում ասաց Կարենի մորաքույր Ալինա Աբրահամյանը. «9 ամսվա ծառայող զինվորը չէր կարող զենքի հետ անփույթ վարվել»:
Ալինա Աբրահամյանի խոսքով, Կարեն Ավետիսյանը գնդացրորդ է եղել եւ եթե ինքն իրեն է կրակել, ապա պետք է գնդացրով կրակած լիներ, սակայն, տիկին Ալինայի խոսքով, Կարենի ստացած վնասվածքը գնդացրի փամփուշտից հասցված վիրավորում չի եղել:
«Գնդացրի փամփուշտը մոտ 12 սմ է, պատահական 3-4 սմ-ի մասին չի խոսքը։ Այրվածքն էլ է շատ փոքր, նշանակում է, որ հեռավորություն է եղել։ Մոտիկից եթե լիներ միայն կոկորդի փոքր վնասվածքը չէր լինի, այլ ավելի շատ վնասվածքներ ստացած կլիներ»,- ասաց Ալինա Աբրահամյանը:
Մորաքրոջ խոսքով, Կարեն Ավետիսյանը բանակում ծառայակիցների հետ խնդիրներ չի ունեցել, գոհ է եղել ծառայությունից: Նա մոր հետ վերջին անգամ խոսել է եւ ասել, որ պատրաստվում է դիրքեր բարձրանալ:
«Ամսի 28-ին մայրը պիտի գնար, որ դիրրքերից իջներ, մորը տեսներ։ Իր սիրած ուտելիքներն էր ուզել, պեչենի, քաղցր շոկոլադով, թփով տոլմա, հորքուրի սարքած խավիծը։ Հորքուրն ասել է՝ ավելի լավ է հալվա ուղարկեմ, Կարենն ասել ա՝ չէ, ես քո սարքած խավիծն եմ ուզում»,-պատմեց նա:
Ալինա Աբրահամյանի խոսքով, իրենք դեռ սպասում են դատաբժշկական փորձաքննության ավարտին. «Դատաբժշկական փորձաքննությունն արդեն նշանակված է, հարազատներից մարդիկ կան՝ քեռիներն են, հորաքրոջ տղան է, բայց իրանք չեն հասկանում։ Մենք որպես անկախ փորձագետ կամ վիրաբույժ չենք ընդգրկել այդ գործընթացի մեջ ու այնտեղ շատ հանգիստ կարող է սխալ տեղեկություն գնա»:
Ավելի վաղ տեղեկացրել էինք, որ Արցախի մարտական դիրքերից մեկում ապրիլի 25-ին մահացած հայտնաբերված 19-ամյա զինծառայող Կարեն Ավետիսյանը Երեւանի բնակիչ էր: Նա բանակ էր զորակոչվել մեկ տարի առաջ՝ հուլիսին: Կարեն Ավետիսյանը ընտանիքի միակ որդին էր, ունի իրենից փոքր քույր:
Պարտադիր ժամկետային զինծառայող, շարքային Կարեն Ավետիսյանը ծնոտի շրջանում մահացու հրազենային վնասվածքով հայտնաբերվել է 2017 թվականի ապրիլի 25-ին՝ ժամը 05:00-ի սահմանում:
Նախնական տվյալներով՝ մահացու վնասվածքը Կարեն Ավետիսյանը հասցրել է ինքն իրեն՝ իրեն ամրակցված գնդացրով:
Դեպքի առթիվ երրորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով, կատարվում է նախաքննություն: