«Ելք» դաշինքի քաղաքապետի թեկնածու, ԱԺ պատգամավոր Նիկոլ Փաշինյանը Քանաքեռում քարոզարշավի ժամանակ թեժ բանավեճի բռնվեց Քանաքեռի բնակչուհու հետ։ Տիկինը Փաշինյանին տեսնելով դժգոհեց, որ բոլորը կեղծ են, ճշմարտությունը չեն ասում եւ ինքը չի սիրում կեղծ մարդկանց։ Տիկինը շարունակում էր պնդել, թե արդարություն չկա, ինչին ի պատասխան Նիկոլ Փաշինյանը հիշեցրեց 10 հազար դրամ ընտրակաշառքով ձայնը վաճառող ու արդարություն պահանջող մարդկանց մասին. «Որ 10 հազար դրամ վերցնում ու քվեարկում են, արդարություն կա՞, մենք եկել ենք, ձեզ ասում ենք, որ կարող է լինել այլ կերպ, եւ մի վերցրեք դա։ Ես հասկանում եմ՝ էնքան պատգամավոր չեք տեսնում, հենց մեզ տեսնում եք, ինչ հարցեր Սերժ Սարգսյանին պիտի տայիք, մեզ եք տալիս, մի քվեարկեք Հանրապետական կուսակցության օգտին»։
Քանաքեռի բնակչուհին վստահեցրեց, թե երբեք չի քվեարկել ՀՀԿ–ի օգտին, քանի որ ինքը «Բարգավաճ Հայաստան» կուսակցությանն է ընտրել։ ԲՀԿ–ին ընտրելու հանգամանքը շարժեց դաշինքի անդամների ծիծաղը, որից հետո Փաշինյանն առաջարկեց ծափերով ողջունել կնոջը։ «Կեղծ մարդ չեք սիրում ու Բարգավաճի օգտին եք քվերակե՞լ»,–տիկնոջը դիմեց Փաշինյանը։