Ես Թուրքիայի կողմից Չեխիայի դեմ որեւէ գործողություններ չեմ ակնկալում ։ Այս մասին NEWS.am–ի թղթակցին հայտնել է Չեխիայի խորհրդարանի պատգամավոր Ռոբին Բյոնիշը, որը Չեխիայի խորհրդարան էր ներկայացրել Հայոց ցեղասպանության մասին բանաձեւի նախագիծը։
Ապրիլի 25-ին բանաձեւը ընդունվել է 104 «կողմ» ձայներով։ Փաստաթղթում Հայոց ցեղասպանությունը որակված է մարդկության դեմ հանցագործություն։
«Թուրքիայի տնտեսությունը կախված է Եվրոպայից ու ազատ առեւտրի մասին համաձայնագիրը նրա համար առանցքային նշանակություն ունի։ Դրա համար էլ ես Չեխիայի դեմ որեւէ գործողություն չեմ ակնկալում»,- հայտնել է պատգամավորը
Այն հարցին, արդյոք բանաձեւը կառաջացնի իրավական հետեւանքներ ու արդյոք Չեխիայում կարգելեն Հայոց ցեղասպանության հրապարակային ժխտումը, Բյոնիշը պատասխանեց, որ երկրի Քրեական օրենսգիրքը հիմա էլ է արգելում ժխտել, հարցականի տակ դնել, գովերգել կամ արդարացնել ցեղասպանությունը
Եվ այսպես ՔՕ 13 հոդվածի 1-ին մասի 405 պարբերությունում ասվում է․
«Ով հրապարակավ ժխտում է, կասկածի տակ դնում, գովերգում կամ փորձում արդարացնել նացիստական կամ այլ ցեղասպանությունները , կամ նացիստական եւ մարդկության դեմ այլ հանցագործությունները կամ ռազմական հանցագործությունները կամ աշխարհի դեմ հանցագործությունները , կպատժվի 6 ամսից մինչեւ 3 տարի ազատազրկումով»։