Տեքստի վրա մի քանի տարվա աշխատանքից հետո ԵՀ-ն ապրիլի 26-ին ներկայացրել է յուրատեսակ սոցիալական խարտիա՝ «Սոցիալական իրավունքների եվրոպական հիմունքներ» անվանումով, որը բաղկացած է երեք գլխից ու 20 կետերից։ Փաստաթղթում ամրագրված են ԵՄ բնակիչների կրթության, աշխատանքի հավասար հնարավորությունների, արդարացի աշխատավարձերի ու արտոնությունների իրավունքները , հայտնում է DW–ն։
ԵՀ-ում ընդունում են, որ թվարկված կետերից շատերը ոչ մի նոր բան չեն պարունակում, սակայն հույս են հայտնում, որ այս փաստաթուղթը, որը պարտադիր բնույթ չունի, կդրդի ԵՄ անդամ երկրներին ընդունել համաեվրոպական սոցիալական սկզբունքները։ Սա ԵՀ-ի նախաձեռնություններից մեկն է ՝ ԵՄ ներսում սոցիալական չափորոշիչները համահավասարեցման գործընթացի շրջանակում։
«Մենք պետք է նորից շահենք մարդկանց վստահությունը»,- հայտնել է ԵՀ-ի սոցիալական հարցերով հանձնակատար Մարիանա Տիսսենը։ Շատ վերլուծաբանների կարծիքով այս քայլով Բյուսելը փորձում է պայքարել աջ պոպուլիստական կուսակցությունների այն մեղադրանքների դեմ, ըստ որոնց Բրյուսելի քաղաքականությունը հակասում է սոցիալական պարտավորություններին։