Փորձագետները, որոնք մասնակցում են ՏՈւ-154 օդանավի կործանման հետաքննությանը, հանգել են այն եզրակացության, որ օդանավը գերծանրաբեռնված է եղել, հայտնում է Gazeta–ն։
Պարբերականի տեղեկություններով նորմատիվային 98 տոննայի փոխարեն օդանավը 110 տոննա ծանրաբեռնվածությամբ է թռիչքն իրականացրել։ Մերձմոսկվայի Չկալովի օդանավակայանից այն օդ է բարձրացել 99․6 տոննա քաշով՝ վառելիքի հետ միասին։ Ադլերում օդանավը վերալիցքավորել են, որից հետո քաշը հասել է 110 տոննայի։
Անձնակազմը կհրաժարվեր թռիչքից, եթե իմանար նորմատիվային քաշի 10 տոննայից ավելի գերազանցման մասին, կամ էլ թռիչքը կիրականացներ գերծանրաբեռնվածությունը հաշվի առնելով։ «Անձնակազմի վերջին գործողությունները կարելի է բացատրել նրանով, որ օդաչուները կռահել էին, որ օդանավի հետ ինչ-որ խնդիրներ կան ու փորձել են վերադառնալ թռիչքի օդանավակայան»,- գրում է պարբերականը։ Ազդեցություն է ունեցել նաեւ չվերթի ժամը՝ անձնակազմը պատկերացում չուներ, որ ջրի մակերեսին քիչ հեռավորություն է մնացել։
Ավիացիոն անվտանգության հարցերով փորձագետ Վալենտին Դուդինը ՌԲԿ-ի հետ զրույցում «միանգամայն հավանական» է անվանել այն վարկածը, որ Տու 154-ի կործանումը գերծանրաբեռնվածության հետեւանքով է տեղի ունեցել։ Նրա խոսքով օդաչուները ամենայն հավանականությամբ իմացել են այդ խնդրի մասին, սակայն «նրանք կատարում են հրամանը ու ոչ միշտ են կարողանում առարկել վերադաս ղեկավարությանը»։
