Մասաչուսեթս նահանգի Ներկայացուցիչների պալատում անցել է Հայոց ցեղասպանության 102-րդ տարելիցին նվիրված միջոցառում։ Միջոցառման ժամանակ ելույթ են ունեցել նահանգի իշխանությունների ներկայացուցիչները։
Մասնավորապես ողջույնի խոսքով է հանդես եկել Մասաչուսեթսի ներկայացուցիչների պալատի խոսնակ Ռոբերտ Ա․ Դելեոն, նա շնորհակալություն է հայտնել բոլոր նրանց , ովքեր հսկայական աշխատանք են իրականացրել նահանգի հայկական համայնքի համար։ Նա նաեւ հիշատակել է «Խոստում» ֆիլմի մասին, որն ապացուցում է , թե ինչի է հասել հայկական համայնքը Հայոց ցեղասպանությունը վերապրելուց հետո։ «Մենք պետք է ապահովենք, որ մարդկային ոգին մթագնի անմարդկայնությունը»,- ասել է Դելեոն։
Հիմնական զեկույցով է հանդես եկել Մասաչուսեթսի գլխավոր դատախազ Մաուրա Հիլին։ Նա շեշտել է, որ Հայոց ցեղասպանությոնը եղել է պատմության ամենամռայլ ժամանակաշրջանը։ «Որպես գլխավոր դատախազ ես գիտեմ, որ կարեւոր է հանցագործությունն անվանել իր անունով ու մեղավորներին պատասխանաատվության կանչել»,- ասել է Հիլին։ «Հենց դրա համար էլ այդքան ամոթալի է, որ ինչ -որ մեկը, կամ ինչ-որ երկիր հրաժարվում է ճանաչել Հայոց ցեղասպանությունը»։ Նա հավելել է, որ ժխտումը պետք է մարդու իրավունքների բոլոր պաշտպաններին ու արդարության համար պայքարողներին դրդի շարունակել իրենց պայքարը։
Նահանգապետը 2017-ի ապրիլի 24-ժը հռչակել էր Հայոց ցեղասպանության զոհերի հիշատակի օր։