Երեւանի կենտրոնում իր կնոջը ծեծելու մեջ մեղադրվող Գեւորգ Սարգսյանի գործով նիստերը տեղի չեն ունենում:
NEWS.am-ի հետ զրույցում Գեւորգ Սարգսյանի՝ «Ջունգլի», պաշտպան Թամարա Բաղդասարյանը հայտնեց, որ դեկտեմբերի վերջին դատարան ուղարկված այս գործով առ այսօր ոչ մի նիստ տեղի չի ունեցել:
«Դատարանը պատճառաբանում է, որ քանի որ այլ դատարանի որոշմամբ է Գեւորգ Սարգսյանը կալանավորվել, այդ պատճառով նրանց թույլտվությունն է պետք Գեւորգ Սարգսյանին Կենտրոն եւ Նորք Մարաշ վարչական շրջանների ընդհանուր իրավասության դատարան բերելու համար»,- ասաց պաշտպանը:
Թե ինչու չի մինչեւ հիմա դատարանը թույլտվություն չի ստացել, փաստաբանի համար էլ է զարմանալի:
Ըստ մեղադրական եզրակացության` Գեւորգ Սարգսյանը («Ջունգլը») «Ֆեյսբուք» սոցիալական կայքում կնոջ լուսանկարները ինչ-որ անձի կողմից հավանություն տալու կապակցությամբ ծագած վիճաբանության վերաբերյալ նրա հետ խոսելու պատրվակով նոյեմբերի 26-ին հանդիպել է կնոջը, առաջարկել անցնել փողոը, սակայն նա չի համաձայնվել: «Ջունգլը», նրա ձեռքից բռնած քաշելով, անցկացրել է փողոցը, ցանկացել նստեցնել իր ընկերոջ ավտոմեքենան, ինչի ընթացքում ձեռքերով հարվածներ է հասցրել կնոջ մարմնի տարբեր հատվածներին, կծել է նրա ձախ թեւը:
Գեւորգ Սարգսյանին մեղադրանք է առաջադրվել Քրեական օրենսգրքի 118-րդ հոդվածի (ծեծ) հատկանիշներով: Նա կալանավորված է:
Նշենք, որ Գեւորգ Սարգսյանը մեղադրվում էր նաեւ ազատամարտի մասնակից, 52-ամյա Վարդան Թումանյանին ծեծելով սպանելու մեջ, սակայն, «Ջունգլին» Ավան եւ Նոր-Նորք վարչական շրջանների ընդհանուր իրավասության դատարանը ազատ էր արձակել՝ մերժելով խափանման միջոցը փոխելու եւ կալանք կիրառելու վերաբերյալ դատախազի միջնորդությունը: Միայն կնոջը ծեծելու դեպքից հետո Ավան եւ Նոր Նորք վարչական շրջանների ընդհանուր իրավասության դատարանը որոշում կայացրեց կալանավորել Սարգսյանին:
