Հայասատանի Սահմանադրական դատարանն ապրիլի 27-ին շարունակել է «Կոնգրես-ՀԺԿ» դաշինքի հայցի քննարկումը՝ ապրիլի 2-ին տեղի ունեցած խորհրդարանական ընտրությունների արդյունքներն անվավեր ճանաչելու պահանջով։
Ելույթ ունենալով հարցի քննարկման ժամանակ՝ «Կոնգրես-ՀԺԿ» դաշինքի ներկայացուցիչ Լեւոն Զուրաբյանը նշել է. «Ընտրություններում մենք հետաքրքիր դինամիկա ունենք։ Հայաստանի բնակչությունն աստիճանաբար նվազում է, սակայն մյուս կողմից ընտրություններին մասնակցության պաշտոնական թիվն աստիճանաբար ուռճացվում է։ Ինչպե՞ս է դա հնարավոր դառնում»։
Մասնավորապես, Զուրաբյանը նշեց, որ 2008 թվականից 2017 թվականի ընթացքում ընտրողների ցուցակներում ավելացել են շուրջ 400 հազար ընտրողներ. «2008-2012 թթ. 200 հազարից ավելի շատ մարդ է ավելացել ընտրացուցակի մեջ, 2012-2017 թթ. կրկին նույն քանակով: Երկու ընտրությունների ընթացքում երկրում մոտ 400 հազար մարդ է եղել, որ նոր է ավելացել ընտրողների ցուցակում»:
Ի պատասխան՝ ՀՀ Կենտրոնական ընտրական հանձնաժողովի նախագահ Տիգրան Մուկուչյանը նախ նշեց. «Նորից դեժավյուի գիրկն ընկանք: 2017 թվում ենք, ի՞նչ կապ ունի 2012 թվականը», ապա շարունակեց. «Ներկա պահին քվեարկած ընտրողների բոլոր ցուցակները հրապարակվել են։ Այդ ցուցակները ի ցույց էին դրվել ամբողջ աշխարհին»։
Զուրաբյանի կրկնակի հարցին, թե ինչո՞վ է պայմանավորված Հայաստանում ընտրած քաղաքացիների թվի ուռճացումը՝ նկատի ունենալով այն, որ Հայաստանի բնակչությունն աստիճանաբար նվազում է, Մուկուչյանը նշեց. «Ընտրողների մասնակցությամբ»։
ԿԸՀ նախագահը նկատեց, որ ընտրություններից 40 օր առաջ ցուցակները հրապարակված են եղել, ուստի բավականին ժամանակ է եղել դրանք ուսումնասիրելու և անճշտություններ հայտնաբերելու դեպքում բարձրաձայնելու համար: