Մշակույթի նախարար Արմեն Ամիրյանը համակարծիք չէ, որ Երեւանի քաղաքապետ Տարոն Մարգարյանն իր պաշտոնավարման տարիներին ոչնչացրել է մշակութային արժեքներ:
Այսօր՝ ապրիլի 27-ին, Կառավարության նիստից հետո լրագրողները Արմեն Ամիրյանին խնդրեցին գնահատել Տարոն Մարգարյանի կատարած աշխատանքը՝ հաշվի առնելով, որ նա ոչնչացրել է պատմամշակութային կառույցներ Երեւանում:
«Չեմ կարծում, որ քաղաքապետը ոչնչացրել է այդ կառույցները: Խոսքը վերաբերում է Տարոն Մարգարյանին, նա շատ լավ իրականացնում է իր պարտականությունները, պարտավորությունները, հավելյալ հորդորման կարիք նա չունի: Նրա կատարած աշխատանքը ես բավարար եմ գնահատում»,- ասաց նա:
Լրագրողների հարցին՝ Ձեզ դո՞ւր է գալիս, որ Երեւանում ոչնչացվել են մշակութային արժեքները, Արմեն Ամիրյանն արձագանքեց. «Եթե այսպես շարունակենք գնահատել, կնշանակի, որ որեւէ կերպ չենք կարողանալու իրականացնել ներդրումային ծրագրերը: Եկեք մի քիչ ավելի հանդուրժող լինենք եւ հասկանանք՝ ինչն է ոչնչացվել, ով է ոչնչացրել, երբ է ոչնչացրել»:
Նշենք, որ Երեւանի քաղաքապետի ընդդիմադիր թեկնածուները պնդում են, որ Տարոն Մարգարյանի պաշտոնավարման տարիներին Երեւանում պատմամշակութային կառույցներ են ոչնչացվել, այդ թվում Աֆրիկյանների տունը, Փակ շուկան:
