Հայաստանի Պետական եկամուտների կոմիտեն հարկային ստուգումներ է կատարել Երեւանի եւ հանրապետության տոնավաճառներում, սակայն ոչ մեկին չի տուգանել: Ապրիլի 27-ին՝ կառավարության նիստի ժամանակ այս մասին ասաց ՊԵԿ-ի նախագահ Վարդան Հարությունյանը՝ պատասխանելով վարչապետ Կարեն Կարապետյանի հարցին:
Հարությունյանի խոսքով՝ ստուգումները նախազգուշացման բնույթ ունեին: Դեռեւս նոյեմբերից հարկայինը բիզնեսին հիշեցնում է փաստաթղթաշրջանառությանը հետեւելու անհրաժեշտության մասին: «Փոքր եւ միջին բիզնեսը հասկանում է, որ խստությունը հիմնականում իրեն չի վերաբերում, այլ խոշոր բիզնեսին»,- հավաստիացրեց Հարությունյանը:
«Մեր մոտեցումն այսպիսին է՝ փոքր եւ միջին բիզնեսի ծանրաբեռնվածությունն իսկապես չի կարելի մեծացնել, բայց ահա նրա հաշվառումը պետք է խիստ լինի»,- իր հերթին նշեց վարչապետը:
