Ի՞նչ գործ ունեն մտավորականները Երեւանի ավագանու ՀՀԿ թեկնածուների ցուցակում: Այս մասին այսօր` ապրիլի 27-ին, լրագրողների հետ հանդիպման ժամանակ նշել է Երեւանի ավագանու ընտրություններում «Երկիր ծիրանի» կուսակցության թեկնածու Խաչատուր Խաչատրյանը, հարցն ուղղելով ասուլիսին ներկա ՀՀԿ ներկայացուցիչ Վահե Նիկոյանին, սակայն վերջինս հարցը թողեց անպատասխան:
«Դժբախտությունը ոչ իշխանությունն է, ոչ տնտեսական քաղաքականությունը: Դժբախտությունը մեր նոր մշակույթի բացակայությունն է: Իշխանական կուսակցության ավագանիի ցուցակի մեջ ինչքան մտավորականներ կան: Ի՞նչ գործ ունի մտավորականը տրանսպորտի, տնտեսական խնդիրների հետ: Եթե մտավորական ես, ուրեմն մտավորականը իր էությամբ պիտի ընդդիմադիր լինի»,-ասաց նա:
Այս հարցին պատասխան չստանալուց հետո Խաչատուր Խաչատրյանը հնչեցրեց իր հաջորդ հարցը. «Ինչո՞ւ փոողոցները սկսեցին ասֆալտապատել հենց ընտրություններից առաջ», որին Նիկոյանը կարճ պատասխանեց. «Ձմեռ էր»:
«Երկիր Ծիրանի» կուսակցության ներկայացուցիչը նկատեց, որ ամբողջ աշխարհում անգամ - 40 աստիճան ցրտի պայմաններում ասֆալտ են անում. «Շատ տրագիկ վիճակ էր ձմռանը, էդ ժամանակ անեիք: Ճանապարհի էս փոսից փախնում էիր էն փոսը, էս մեկից էն մեկը: Նենց տպավորություն էր, ոնց որ ուզում ես Հանրապետականից փախնես ընկնում ես «Բարգավաճ», «Բարգավաճից» փախնում ես ընկնում ես «Ելք», «Ելք»-ից փախնում ես ընգնում ես չգիտես որտեղ»:
Վահե Նիկոյանը սակայն նշեց, որ քաղաքապետարանի 2013 թվականի ծրագիրը աննախադեպերից էր, որը գրեթե ամբողջությամբ կատարվել է: Նա նշեց, որ այս ժամանակահատվածում միկրոավտոբուսների քանակը 1700-ից կրճատվել է 1200-ի, իսկ ավտոբուսների քանակը 270-ից հասել է 460-ի:
«Երեւանում կան 25 մլն քմ ասֆալտապատ փողոցներ, եւ մենք տարեկան նորոգում ենք մոտ 700.000 քմ տարածք: Ցանկացած քաղաքային իշխանություն կերազի կառուցել մետրոյի նոր կայարան, բայց պետք է այդ ամենը դիտարկել առաջնահերթությունների եւ հնարավորությունների համատեքստում»,-ասաց նա:
Հիշեցնենք, որ Երեւանի ավագանու ընտրությունները տեղի է ունենալու մայիսի 14-ին, որին մասնակցելու է ՀՀԿ-ն, «Երկիր Ծիրանի» կուսակցությունն ու «Ելք» դաշինքը: