Հայաստանի քաղաքական ուժերը դրական առաջընթաց չեն ակնկալում ղարաբաղյան հարցում դեկտեմբերի 1-2-ին Աստանայում կայանալիք ԵԱՀԿ գագաթնաժողովից:
Ինչպես խորհրդարանում կայացած ճեպազրույցում ասել է «Ժառանգություն» խմբակցության ղեկավար Ստեփան Սաֆարյանը, կողմերն առայժմ այնքան կոշտ են պնդում իրենց դիրքորոշումները եւ փոխզիջման հակված չեն, որ ղարաբաղյան հարցում որեւէ առաջընթաց ակնկալելն անիմաստ է:
ՀՅԴ խմբակցության քարտուղար Արտյուշա Շահբազյանն, իր հերթին, հայտարարել է, թե գագաթաժողովում դժվար թե կողմերին որեւէ փաստաթուղթ ներկաայցվի, քանի որ դա կարող է սրել իրավիճակը աննախադեպ լարվածության պայմաններում: Ընս նրա, Աստանայում փորձ կարվի ամրապնդել արդեն ձեռքբերված պայմանավորվածությունները: Ըստ պատգամավորի՝ քանի դեռ Ադրբեջանը չի համակերպվել ստատուս-քվոյի հետ եւ չի գնացել փոխզիջումների, ղարաբաղյան հակամարտության լուծում ակնկալել չարժե:
«Բարգավաճ Հայաստան» խմբակցության քարտուղար Արամ Սաֆարյանը նշել է, թե այսօրվա դրությամբ խոսքը չի գնում Աստանայում ինչ-որ փաստաթուղթ ստորագրելու մասին, իսկ ՀՀԿ խմբակցության ղեկավար Գալուստ Սահակյանը նկատել է, որ Աստանայում բանակցությունների հերթական փուլ է լինելու: