Հանրապետական կուսակացության կողմից վարչական ռեսուրսի տոտալ օգտագործման ակնհայտ ապացույցները եւ ընտրողների նկատմամբ ճնշումները ԿԸՀ-ի կողմից չեն ուսումնասիրվել: Այս մասին ապրիլի 28-ին իր եզրափակիչ խոսքում ասաց ՀԱԿ փոխնախագահ Լեւոն Զուրաբյանը՝ Սահմանադրական դատարանում հանդես գալով «Կոնգրես-ՀԺԿ» դաշինքի՝ ապրիլի 2-ի խորհրդարանական ընտրություններն անվավաեր ճանաչելու հայցի քննության ժամանակ:
Ավելին, նրա խոսքով, այդ հանցագործությունները թաքցվել են, դրանց հիման վրա ապօրինի որոշումներ են ընդունվել. «Եւ հնարավորություն չի ընձեռվել վերացնել ընտրողների ազատ կամարտահայտմանը խոչընդոտող էական գործոնը: ԿԸՀ –ի կողմից հաստատված արդյունքները չեն արտացոլում ժողովրդի ազատ կամքը եւ պետք է անվավեր ճանաչվեն», - ընդգծեց Լեւոն Զուրաբյանը:
Նա ԿԸՀ-ին՝ Տիգրան Մուկուչյանի ղեկավարությամբ, ինչպես նաեւ Գլխավոր դատախազությանը մեղադրեց ընտրությունների ժամանակ խախտումներն ու կեղծարարությունները թաքցնելու մեջ: Լեւոն Զուրաբյանը նկատեց, որ ՀՀ Քրեական օրենսգրքի 154 հոդվածի համաձայն՝ ընտրական կաշառքի մասին խոստումը քրեորեն հետապնդելի է, սակայն ԿԸՀ-ն անգամ արձանագրված դեպքերի մասին տվյալները չի ուղարկել դատախազություն:
ՀԱԿ փոխնախագահը վստահություն հայտնեց, որ ՍԴ-ն չի բավարարի դաշինքի հայցը ոչ թե ապացույցների անբավարարության պատճառով, այլ որ այն կոչված է ծառայելու ՀՀԿ-ի շահերին:
Լեւոն Զուրաբյանի ելույթից հետո դահլիճում ծափահարություններ հնչեցին, ինչին ՍԴ նախագահ Գագիկ Հարությունյանն արձագանքեց. «Դուք թատերական ներկայացման չեք»:
