Facebook սոցկայքի օգտատերերին «անվտանգ» «պահելու» համար ընկերության ներկայացուցիչները որոշել են պայքարել կայքում տեղադրված «տեղեկատվական գործողությունների չարաշահումների» դեմ, հաղորդում է РБК-ն։
Ինչպես հստակեցրել են Facebook-ում՝ նման «չարաշահումներին» են վերաբերվում նաեւ «երկրում արտաքին ու ներքին քաղաքականության աղճատմանն» ուղղված «կառավարական ու ոչ պետական սուբյեկտների» գործողությունները։ Նրանք բոլորը, ընկերության ներկայացուցիչների տվյալներով, «հիմնականում» ձեռնարկվում են «ռազմավարական կամ աշխարհաքաղաքական արդյունքների հասնելու համար»։ «Նման գործողությունները կարող են իրենցից ներկայացնել կեղծ լուրեր ու ապատեղեկատվություն»,-ասել են ընկերությունում՝ սակայն չհստակեցնելով, թե կոնկրետ որ երկրներն են մեթոդներից օգտվում։
Բացի այդ, տեղեկատվական դաշտում «չարաշահում» են համարվում «կեղծ օգտահաշիվները՝ ստեղծված հասարակական կարծիքը մանիպուլյացիայի ենթարկելու համար»։ Նշվում է, որ այդ գործողությունները կարող են արտահայտվել միեւնույն «մեմերի», «սպամի» հրապարակմամբ, ինչպես նաեւ լրագրողներին կեղծ մեկնաբանություններ տալով ու ապատեղեկատվություն տարածելով։