ՌԴ Տոմսկ քաղաքի բնակիչները փրկել են իննամյա տղային, ով ցատկել է 7-րդ հարկում այրվող պատշգամբից, հաղորդում է Vtomske.ru-ն։ Հրդեհի ականատեսները պոկել են գովազդային պաստառը, փռել գետնին, եւ տղան ընկել է դրա վրա։
Արտակարգ իրավիճակների նախարարության տարածաշրջանային բաժնից հայտնել են ապրիլի 27-ին, տեղի ժամանակով՝ 20։13-ին 10 հարկանի քարե շենքի 7-րդ հարկում բնակարանային հրդեհի մասին։
«Բնակարանը պատել էր ծխով, այրվում էր պատշգամբը»,-ասել են Արտակարգ իրավիճակների նախարարության մամուլի ծառայության ներկայացուցիչները։ «Դեպքի վայր տեխնիկայի երեք միավոր է ուղարկվել։ Պատշգամբում գտնվել է երեխան՝ 2008 թվականին ծնված։ Մինչ հրշեջների ժամանելը, ականատեսները փռել են գովազդային պաստառն ու տղան ցատկել է պաստառի վրա»,-ասվում է հաղորդագրությունում: