Հայցվոր կողմը ներկայացրեց իր մոտեցումները՝ չտրամադրելով ոչ մի հիմնավոր ապացույց։ Այս մասին ապրիլի 28-ին Սահմանադրական դատարանում ապրիլի 2-ին տեղի ունեցած խորհրդարանական ընտրություններ անվավեր ճանաչել պահանջող «Կոնգրես-ՀԺԿ» դաշինքի հայցը քննարկելիս իր եզրափակիչ խոսքում ասել է Հայաստանի Կենտրոնական ընտրական հանձնաժողովի նախագահ Տիգրան Մուկուչյանը։
Նրա խոսքով՝ դատական քննության ընթացքում հստակորեն մեկ հանգամանք է ընդգծվել. «Իր դիրքորոշումը ներկայացնելիս հայցորդը, կոնկրետ հանգամանքների մասին խոսելու փոխարեն, ավելի շատ քննարկում էր Ընտրական օրենսգրքի դրույթների ընկալման ու մեկնաբանության հարցերը։ Դատաքննության ընթացքն ակնհայտորեն վկայում է այն մասին, որ հայցորդի դատողությունները փաստացի ապացույցներ չեն պարունակում։ Ներկայացված իբր թե փաստացի հանգամանքները, մեղմ ասած, իրենցից ոչ մի իրավական արժեք չեն ներկայացնում», - ընդգծել է Տիգրան Մուկուչյանը։