Ինդոնեզիայում հոգեւոր մուսուլման կանանց համաժողովը ֆաթվա է հրապարակել՝ ընդդեմ 18 տարեկանից փոքր աղջիկների հետ ամուսնության, հաղորդում է BBC-ն։
Հավաքված կանայք տեղի կառավարությանը կոչ են արել բարձրացնել կանանց ամուսնանալու տարիքը՝ ներկայիս 16-ից հասցնելով 18-ի։
Նրանք համոզված են, որ վաղ ամուսնությունները խանգարում են ինդոնեզիացիներին շարունակել կրթությունը, իսկ միությունների կեսն ավարտվում է ամուսնալուծությամբ։
Ֆաթվան որեւէ հարցի շուրջ իրավական դիրքորոշում է, որը ձեւավորում են մուսուլմանական հոգեւորականության ներկայացուցիչները։ Այն իրավական ուժ չունի, սակայն հավատացյալների շրջանում կշիռ ունի։