Ապրիլի 28-ին Բրյուսելում կայացավ ԵՄ Արեւելյան գործընկերության (ԱլԳ) ավագ պաշտոնյաների հերթական հանդիպումը, որին մասնակցեցին գործընկեր վեց պետությունների եւ ԵՄ անդամ երկրների ներկայացուցիչները։

ՀՀ ԱԳՆ-ից NEWS.am-ին հայտնում են, որ ՀՀ պատվիրակությունը գլխավորում էր ԱԳ նախարարի տեղակալ Կարեն Նազարյանը։

Հանդիպման նպատակն էր անդրադարձ կատարել ԱլԳ ձեւաչափի արդյունավետությանը եւ քննարկել հնարավոր կառուցվածքային փոփոխությունների առաջարկները՝ նոյեմբերին Բրյուսելում կայանալիք ԱլԳ գագաթաժողովին ընդառաջ։

ԱԳ նախարարի տեղակալն իր ելույթում ներկայացրեց վերջին շրջանում տեղի ունեցած զարգացումները, մասնավորապես՝ նոր շրջանակային համաձայնագրի նախաստորագրումը եւ կարեւորեց ՀՀ-ԵՄ գործընկերության առաջնայնությունների հաստատումը մոտ ապագայում։ Կարեն Նազարյանը խոսեց նաեւ ԵՄ հետ շարունակվող տնտեսական համագործակցության եւ ոլորտային երկխոսության մասին՝ ընդգծելով, որ այն ԱլԳ անկյունաքարերից մեկն է։

Խոսելով ապագա գագաթաժողովին ընդառաջ Հայաստանի ակնկալիքների մասին՝ նախարարի տեղակալը մեծապես կարեւորեց ԵՄ անդամ երկրների հետ նախկինում ստանձնած համատեղ հանձնառությունների լիակատար իրականացումը, մասնավորապես կենտրոնանալով վիզաների ազատականացման շուրջ Հայաստան-ԵՄ երկխոսության մեկնարկի անհրաժեշտությանը, որի նպատակն է առավել մոտեցնել հանրություններին՝ փոխադարձ շփումների համար ստեղծելով ապահով եւ արդյունավետ միջավայր։