400 կվ հզորությամբ Իրան-Հայաստան նոր էլեկտրահաղորդման գիծը պատրաստ կլինի մինչեւ 2017 թվականի սեպտեմբեր։ Այս մասին ապրիլի 28-ին լրագրողներին հայտարարել է ՀՀ էներգետիկ ենթակառույցների ու բնական ռեսուրների փոխնախարար Հայկ Հարությունյանը։
Նոր գիծը զգալիորեն կուժգնացնի էլեկտրաէներգիայի հոսքերը երկու պետությունների միջեւ, հավելել է նա։
Այժմ Հայաստանի ու Իրանի միջեւ գործում են 2 ԷՀԳ-եր՝ մինչեւ 220 կվ հզորության։ Նոր ԷՀԳ-ն՝ թվով 3-րդը եւ 400 կվ հզորությամբ, կձգվի Մեղրիից (Իրանի հետ սահմանին) մինչեւ Հրազդան, որտեղ Հրզադանի ՋԷԿ-ից մոտ 10 կմ հեռավորությամբ ծրագրվում է կառուցել 440/220 կվ ենթակայան։ Այնտեղից էլ, բայց արդեն մեկ այլ ծրագրով (գերմանական KfW բանկի վարկով, ինչպես նաեւ EIB-ի եւ Եվրամիության համաֆինանսավորմամբ, ընդհանուր ֆինանսավորումը 105,2 մլն եվրո է) կկառուցվի նոր 400 կվ հզորությամբ ԷՀԳ դեպի Վրաստան։
400 կվ լարվածության գիծը կմեծացնի երկու երկրների միջեւ էներգետիկ հոսքերի հնարավորությունը՝ 350-1000 մվ-ով, ինչպես նաեւ կբարձրացնի Հայաստանի հարավում ու կենտրոնում էներգոմատակարարման հուսալիությունը։