Կենտրոն եւ Նորք-Մարաշ վարչական շրջանների քննչական բաժնի վարույթ
ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնում վարույթ է ընդունվել փաստաբան Տիգրան Աթանեսյանի հաղորդման հիման վրա ոստիկանությունում հարուցված քրեական գործը:
Այս առնչությամբ ՀՀ Քննչական կոմիտեի տարածած հաղորդագրության մեջ ասվում է.
«Ոստիկանությունում 2017թ. ապրիլի 27-ին հաղորդում է ստացվել, որ նույն օրը փաստաբան Տիգրան Աթանեսյանի աշխատասենյակում տեղի ունեցած վիճաբանության ընթացքում ծեծի են ենթարկվել Տիգրան Աթանեսյանը եւ նրա ընկեր Արմեն Սողոմոնյանը:
Դեպքի առթիվ նույն օրը ՀՀ ոստիկանության ԵՔՎ Կենտրոնական բաժնում հարուցվել է քրեական գործ՝ ՀՀ քրեական օրենսգրքի 118-րդ հոդվածի հատկանիշներով եւ ուղարկվել ՀՀ ՔԿ ԵՔՔՎ: Քննիչը վարույթ է ընդունել քրեական գործը, ձեռնարկվում են անհրաժեշտ քննչական միջոցառումներ՝ միջադեպի բոլոր հանգամանքները պարզելու ուղղությամբ, Տ.Աթանեսյանը եւ Ա.Սողոմոնյանը ճանաչվել են տուժող:
Կատարվել է դեպքի վայրի զննություն, նշանակվել դատաբժշկական փորձաքննություններ:
Ավելի վաղ NEWS.am-ը հայտնել էր, որ երեկ՝ ապրիլի 27-ին Տիգրան Աթանեսյանը հայտարարել էր, թե Սիմոն Բաբայանը, ՓՊ նախագահի խորհրդականներ Գեւորգ Մկրտչյանն ու Վրեժ Խաչիկյանը եւ ոմն Արսեն հարձակվել են իր գրասենյակի վրա։ Արմեն Սողոմոնյանը լուրջ վնասվածքներ էր ստացել։ Նրա խոսքով, իրեն ինչ-որ առարկայով հարվածել էր հենց Սիմոն Բաբայանը։
Ի դեպ, Տիգրան Աթանեսյանն ու Արմեն Սողոմոնյանը ՓՊ նախագահի ընդդիմախոսներն են, բազմիցս բարձրաձայնել են պալատում ստեղծված իրավիճակի եւ բարքերի մասին։ Իսկ դեպքից հետո էլ պնդեցին, թե այս ամենի ետեւում հենց Արա Զոհրաբյանն է կանգնած։