Մակեդոնիայի հանրային անվտանգության բյուրոյի տնօրեն Միտկո Չավկովն է գլխավոր մեղավորն այն բանի համար, որ ոստիկանությունը պատշաճ ձեւով չի արձագանքել ու չի կանխել կողմնակի անձանց մուտքը խորհրդարանի շենք ապրիլի 27-ին, ինչի հետեւանքով այնտեղ խոշոր անկարգություններ են տեղի ունեցել։ Այս մասին հայտնել է երկրի ներքին գործերի նախարար Ագիմ Նուխիուն, փոխանցում է ՌԻԱ Նովոստին։ Մի խումբ ցուցարարներ, որոնք համարում էին, որ խորհրդարանի խոսնակ, ալբանացի Տալատ Ջաֆերին ապօրինաբար է ընտրվել այդ պաշտոնին, նախօրեին ներխուժել էին խորհրդարանի շենք, այնտեղ անկարգություններ կազմակերպել ու ծեծել մի քանի պատգամավորների ։
Ագիմ Նուխիուի կարգադրությամբ դեռ մինչեւ բողոքի ակցիան ձեւավորվել էր օպերատիվ շտաբ, որը ուներ գործողությունների ծրագիր բողոքի ակցիաների դեպքում։ Շտաբի ղեկավարը Չավկովն էր նշանակվել։
«Ուզում եմ տեղեկացնել, որ իրավիճակի սրումից հետո մինչեւ 20։00-ն շտաբի ղեկավար Միտկո Չավկովը անհասանելի է եղել, չնայած ես նրան եւ զանգահարել եմ, եւ անձամբ որոնել շտաբում»,- հայտնել է Նիխուին։
Ենթակայի նման վարքագիծը նախարարը բացատրել է Չավկովի վրա քաղաքական ազդեցությամբ, որը գործել է ոչ թե օրենքին համաձայն, այլ « քաղաքական կենտրոնների հրամանով»։ Ըստ Նիխուիի այդ իրավիճակը քննվելու է ՆԳՆ-ում։
Նախարարը նաեւ հայտնել է, որ պատասխանատվություն է զգում այն բանի համար, որ չի կարողացել ՆԳՆ ղեկավարությանն ազատել քաղաքական ազդեցությունից, ու որ պատրաստ է հրաժարական տալ։
Անկարգություններին մասնակցելու համար ձերբակալվել է ութ մարդ։ Վիրավորների քանակը, տարբեր գնահատականներով, կազմում է 83-ից 109 մարդ։
