Արցախում ժամկետային զինծառայող է զոհվել: Հակառակորդի արձակած կրակոցից մահացու վիրավորում է ստացել 19-ամյա Մհեր Ֆելիքսի Արզումանյանը: Քննչական կոմիտեի տեղեկացմամբ՝ Արզումանյանը մահացու վիրավորում է ստացել կրծքավանդակի շրջանում:

Մհեր Արզումանյանը Սյունիքի մարզի Առաջաձոր գյուղից էր, ծառայության էր մեկնել մեկ տարի առաջ: Նա 3 ավագ եղբայր եւ մեկ կրտսեր քույր ունի: Ընտանիքն ապրում է ծանր սոցիալական պայմաններում: Արցախի նախագահի հրամանագրով՝ Մհեր Արզումանյանը հետմահու պարգեւատրվել է «Մարտական ծառայություն» մեդալով:

Սահմանադրական դատարանն այսօր հրապարակած որոշմամբ մերժեց «Կոնգրես-ՀԺԿ»-ի հայցը, որով դաշինքը պահանջում էր անվավեր ճանաչել ապրիլի 2-ի խորհրդարանական ընտրությունները: Սահմանադրության համաձայն՝ Սահմանադրական դատարանի որոշումը վերջնական է եւ ուժի մեջ է մտնում հրապարակման պահից:

Սա նշանակում է, որ նոր գումարման Ազգային ժողովի առաջին նիստը նշանակվելու է մայիսի 18-ին: ԿԸՀ նախագահ Տիգրան Մուկուչյանը տեղեկացրել է, որ մանդատներն արդեն բաշխվել են. հայտնի է, թե յուրաքանչյուր կուսակցությունը քանի մանդատ է ստանալու: Մուկուչյանը նշել է, որ Հանձնաժողովը դեռեւս մանդատից հրաժարվելու դիմումներ չի ստացել եւ ենթադրություն հայտնել, որ դա պայմանավորված էր Սահմանադրական դատարանում «Կոնգրես-ՀԺՇ» դաշինքի հայցի քննությամբ:

Ռուսական կողմի նախաձեռնությամբ Մոսկվայում կայացել է Հայաստանի, Ռուսաստանի եւ Ադրբեջանի արտգործնախարարների աշխատանքային հանդիպումը: Նախարարները քննարկել են ղարաբաղյան կարգավորման բանակցային գործընթացն առաջ մղելու հնարավորությունը: Կողմերն ընդգծել են Վիեննայում եւ Սանկտ-Պետերբուրգում ձեռք բերված համաձայնությունների իրականացման անհրաժեշտությունը: Եռակողմ հանդիպումից հետո նախարարներին են միացել նաեւ ԵԱՀԿ Մինսկի խմբի համանախագահները:

Եվրախորհրդի խորհրդարանական վեհաժողովի բյուրոն անվստահություն է հայտնել գործող նախագահ Պեդրո Ագրամունտին: Բյուրոն նաեւ որոշել է, որ Ագրամունտը լիազորված չէ որեւէ պաշտոնական այց կատարել, ներկա լինել որեւէ խորհրդակցության կամ հրապարակային հայտարարություններ անել ԵԽԽՎ-ի անունից՝ որպես կառույցի ղեկավար: Ի դեպ՝ Ագրամունտը որոշել է չմասնակցել Բյուրոյի այսօրվա նիստին եւ հրաժարականի դիմում չի ներկայացրել: Նշենք, որ Պեդրո Ագրամունտի իմփիչմենթի հարցը բարձրացրել էր ԵԽԽՎ-ում ուկրաինական պատվիրակությունը՝ ռուսական պատվիրակության կազմում Սիրիա մեկնելու պատճառով: Չնայած Պեդրո Ագրամունտը ներողություն խնդրեց՝ Սիրիա այցը սխալ որակելով, բայց դա նրան, փաստորեն, չփրկեց այսօրվա որոշումից:

Հայաստանը «ոչ ազատ» լրատվամիջոցներ ունեցող երկիր է: Նման գնահատական կա Freedom House-ի «Մամուլի ազատություն 2017» զեկույցում: Դրանում նշվել է հատկապես 2016 թվականի ամռան դեպքերի մասին: «Հայաստանում անվտանգության ուժերը 2016 թվականի ամռանը տեղի ունեցած բողոքների ընթացքում մամուլի հանդեպ անհարգալից վերաբերմունք են դրսեւորել՝ կոպտորեն հարձակվելով ակցիաները լուսաբանող մի քանի լրագրողների վրա»,- նշված է զեկույցում: Տարածաշրջանի երկրներից Վրաստանի լրատվամիջոցները շարունակում են առաջատարի դիրքում մնալ՝ «մասնակի ազատ» գնահատմամբ: Ադրբեջանը եւ Թուրքիան ոչ ազատ մամուլ ունեցող երկրներ են: Ավելին, Ադրբեջանն առավել վատ ցուցանիշներով երկրների տասնյակում է՝ Իրանի, Հյուսիսային Կորեայի, Սիրիայի, Թուրքմենստանի եւ Ուզբեկստանի հետ:

Բաքվում կալանավորված Ռուսաստանի քաղաքացի Մարատ Ուելդանով-Գալուստյանը դատապարտվել է 8 տարվա ազատազրկման: Ուելդանով- Գալուստյանն ավստրիական Do&Co ընկերության աշխատակից է: Ընկերությունն անցյալ տարվա հունիսի 6-ին նրան Բաքու էր գործուղել, ուր ժամանելուց հետո նա կապ չի հաստատել ոչ ոքի հետ: Նրան մեղադրում են թմրանյութերի, հոգեմետ նյութերի ապօրինի պատրաստման, ձեռքբերման կամ իրացման մեջ: Լրատվամիջոցների տվյալներով՝ Ադրբեջանում Ռուսաստանի դեսպանատունը Ուելդանով-Գալուստյանի հարազատներին հորդորել է ըմբռնումով մոտենալ Ադրբեջանի առանձնահատկությանը, որտեղ «հայկական ծագումը չափազանց բարդացնում է նրա պաշտպանությունը»:

Երեւանի Երվանդ Քոչար փողոցում այսօր BMW մակնիշի ավտոմեքենան վրաերթի է ենթարկել 4 երիտասարդի: Տուժածները տեղափոխվել են հիվանդանոց: Երիտասարդներից մեկը Վերակենդանացման բաժանմունքում է, բազմաթիվ վնասվածքներ ունի, այդ թվում՝ գանգուղեղային:

Ապրիլի 22-ին ոստիկանությունը հաղորդում էր ստացել, որ Մասիսի 69-ամյա բնակիչ Հարություն Ազատյանն «Օպել» մակնիշի ավտոմեքենայով դուրս է եկել տանից եւ չի վերադարձել: Նույն օրը երեկոյան իրավապահները մեքենան գտել են Նորամարգ գյուղում: Իրավապահները բերման են ենթարկել Նորամարգ գյուղի 36-ամյա բնակիչ Վադիմ Օ.-ին: Նրան կասկածում են Ազատյանին դաժանաբար սպանելու եւ դին Զանգու գետը նետելու մեջ: Սպանության վայրում կասկածյալը պատմել է, որ երկաթով սպանել է իր զոհին, իսկ դին զոհի մեքենայով տեղափոխել սպանության վայրից եւ նետել Զանգու գետը: Բացի այդ, համոզվելու համար, որ Ազատյանը մահացել է, մեկ անգամ էլ ավտոմեքենայով վրաերթի է ենթարկել: Ըստ տեղեկությունների՝ կասկածյալը պայմանագրային զինծառայող է: Նախկինում մեկ այլ տաքսիստի մարմնական վնասվածք պատճառելու համար դատապարտված է եղել:

Դոլարն ու եվրոն շարունակում են թանկանալ: Արդյունքում դոլարի փոխարժեքն այսօր կազմել է 484 դրամ, եվրոյինը՝ 530, ռուբլունը՝ 8 դրամ 50 լումա, ֆունտինը՝ 627 դրամ:

Ապրիլի 29-ին հանրապետության շրջանների մեծ մասում սպասվում է անձրեւ եւ ամպրոպ: Օդի ջերմաստիճանը 3-4 աստիճանով կբարձրանա: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +9+11, ցերեկը՝ +21+23 աստիճան տաքություն: