Ավստրիայի նախագահ Ալեքսանդր վան դեր Բելլենը երկրի բոլոր կանանց կոչ է արել գլխաշորերով ծածկել գլուխները՝ հանուն իսլամաֆոբիայի դեմ պայքարի, հայտնում է The Independent–ը։

«Ոչ միայն մուսուլման կանայք, այլ բոլոր կանայք կարող են գլխաշոր կրել ու եթե իսկական ու բորբոքված իսլամաֆոբիան շարունակվի, ապա կգա մի օր, երբ մենք բոլոր կանանց կխնդրենք գլխաշոր կրել՝ որպես համերաշխության նշան նրանց հետո, ովքեր դա անում են կրոնական նկատառումներով»,- ասել է նախագահը դպրոցներից մեկում աշակերտների հետ հանդիպման ժամանակ։

«Բնականաբար, յուրաքանչյուր կին իրավունք ունի հագնվել այնպես ինչպես իրեն է դուր գալիս, դա պարզապես այս հարցի շուրջ իմ տեսակետն է»,- միանգամից հավելել է վան դեր Բելլենը։

Ավելի վաղ Ավստրիայի նախագահը բազմիցս հայտնել էր, որ դեմ է հագուստի հարցում որեւէ սահմանափակումների։ Որպես բացառություն նա ներկայացրել է դատարանը, որտեղ նրա կարծիքով կին դատավորները պետք է զերծ մնան կրոնական հանդերձանքից, որպեսզի հարցականի տակ չդնեն իրենց չեզոքությունը։

Ալեքսանդր վան դեր Բելլենը Ավստրիայի նախագահ է ընտրվել դեկտեմբերի 4-ին։