Ամերիկյան WGRZ հեռուստաալիքի եղանակի տեսության հաղորդավար Պատրիկ Համերը քիչ էր մնում ուղիղ եթերը խափաներ սարդի պատճառով, որը հայտնվել էր տեսախցիկի օբյեկտիվում, հայտնում է Daily Mail-ը:
Համերը վարում էր եղանակի տեսությունը, երբ էկրանի վրա քարտեզի պատկերը փոխվել է Նյու Յորքի տեսարանով: Պարզվել է, որ քաղաքը թռչնի բարձրությունից նկարող խցիկի օբյեկտիվում սարդ է հայտնվել: Խուճապի մատնված հաղորդավարը մի կողմ է փախել՝ ձեռքերը թափահարելով:
«Սա ի՞նչ է»,- հարցրել է Համերը կադրից դուրս: «Մայր բնությունը»,- նրան պատասխանել է գործընկերներից մեկը:
«Կրքերը» սրանով հանդարտվել են: Սարդը հասցրել է սարդոստայնի մեջ գցել ճանճին եւ սկսել է ուտել ուղիղ եթերում:
«Հետաքրքիր է՝ ով կդառնա հաջորդ զոհը»,- կատակել է հաղորդավարը: Դրանից հետո սարդն սկսել է շարժվել նրա ուղղությամբ: Համերը կրկին կադրից փախել է:
Նա աշխատանքին է վերադարձել, երբ էկրանին պատկերը փոխվել է եղանակի ժամային կանխատեսման աղյուսակով: