Սեւանի քաղաքապետարանի պաշտոնյայի կողմից չարաշահումների գործով դատավճիռ է կայացվել:
Ըստ մեղադրական եզրակացության՝ քաղաքապետարանի աշխատակազմի ճարտարապետա-շինարարական բաժնի պետ Արտաշես Բադալյանը ոչ պատշաճ է կատարել իր վրա դրված պարտականությունները, ինչի հետեւանքով Սեւան համայնքին պաշտոնեական անփութությամբ պատճառել է էական վնաս։
Գեղարքունիքի մարզի ընդհանուր իրավասության դատարանում Բադալյանը միջնորդեց դատաքննությունն անցկացնել արագացված կարգով՝ հայտարարելով, որ ընդունում է իրեն առաջադրված մեղադրանքը:
Դատարանում պարզ դարձավ, որ Բադալյանը ի պաշտոնե պարտավոր լինելով վերահսկել Սեւանում կատարվող շինարարական աշխատանքները, անփութություն է դրսեւորել, ինչի հետեւանքով շինարարներից մեկը ապամոնտաժել եւ Աշտարակ է տեղափոխել 3 մլն արժողությամբ խողովակներ:
Դատարանը պաշտոնյային մեղավոր ճանաչեց Քրեական օրենսգրքի 315–րդ հոդվածի 1–ին մասով եւ տուգանեց ընդամենը 400 հազար դրամով: Նշենք, որ քաղաքապետարանին հասցված վնասն ամբողջությամբ վերականգնվել է:
Նշենք, որ Սեւանի քաղաքապետարանում նախկինում տեղի ունեցած չարաշահումների եւ կուտակած պարտքի մասին աշխատակիցները բարձրաձայնել էին նաեւ վարչապետ Կարեն Կարապետյանի հետ հանդիպման ժամանակ: https://news.am/arm/news/379422.html Նրանք հայտնել էին, որ նախկին քաղաքապետ Ռուդիկ Ղուկասյանն իր պաշտոնավարման տարիներին կուտակել է ավելի քան 150 մլն դրամ պարտք, ինչի հետեւանքով աշխատակիցները չեն կարողանում աշխատավարձ ստանալ:
