Թուրքիայի անդամակցությունը ԵՄ-ին անիրատեսական է։ Այս մասին հայտնել է Ավստրիայի կանցլեր Քրիստիան Կերնը ՝ Բրեքսիթի մասին ԵՄ-ի գագաթնաժողովում, հայտնում է ՏԱՍՍ-ը։

«Մենք չենք հավատում, որ անդամակցությունը իրատեսական տարբերակ է,-ասել է նա, նշելով, որ Թուրքիայում իրադարձությունների զարգացումը մտահոգություն է առաջացնում ԵՄ-ում։

Թուրքիայում ապրիլի 16-ին կայացած հանրաքվեից հետո, որի ժամանակ երկրի քաղաքացիները աննշան առավելությամբ կողմ են արտահայտվել նախագահ Էրդողանի լիազորությունները ընդլայնելուն, ԵՄ-ում սկսել են խոսել ԵՄ-ին անդամակցելու մասին Անկարայի հետ բանակցությունները դադարեցնելու անհրաժեշտության մասին։ Ընդ որում միության պաշտոնական դիրքորոշումը մնում է անփոփոխ ու Թուրքիայի հետ բանակցությունները շարունակվում են։

Թուրքիայի նախագահ Ռեջեփ Էրդողանն էլ մինչ այդ հայտնել էր, որ սահմանադրական հանրաքվեից հետո Թուրքիան կարող է հանրաքվե անցկացնել ԵՄ-ին անդամակցության բանակցությունները շարունակելու հարցով։