ՄԱԿ-ի գլխավոր քարտուղար Անտոնիու Գուտերեշը մտահոգված է Կորեական թերակղզում ռազմական էսկալացիայի հավանականությամբ։
Նրա խոսքով Հյուսիս- արեւելյան Ասիայում զինված հակամարտությունը հսկայական ռազմական հետեւանքներ կունենա ամբողջ աշխարհի համար։ «ԿԺԴՀ-ն աշխարհի միակ երկիրն է, որը այս հարյուրամյակում միջուկային փորձարկումներ է իրականացրել։ Մենք պետք է ենթադրենք, որ յուրաքանչյուր փորձարկումով կամ հրթիռի արձակումով Փհենյանը ավելացնում է իր միջուկային ներուժը ռազմական նպատակներով»,- հայտնել է ԱՆտոնիու Գուտերեշը։
Նա հայտնել է, որ ծայրասիճան մտահոգված է «տարածաշրջանում ռազմական էսկալացիայի հավանականությամբ, այդ թվում սխալ հաշվարկների կամ թյուրըմբռնման հետեւանքով»։ ՄԱԿ-ի գլխավոր քարտուղարը միջազգային համայնքին կոչ է արել չենթարկվել Հյուսիսային Կորեայի սադրանքներին ու հասնել խաղաղ լուծման։ «Ես հատկապես մտահոգված եմ, որ Փհենյանի ապակայունացնող քայլերի հակազդմանն ուղղված ջանքերն էլ իրենց հերթին կարող են հանգեցնել զինված դիմակայության աճին ու ավելի նվազեցնել խաղաղ կարրգավորման հասնելու՝ միջազգային համայնքի հնարավորությունները»,- ասել է Գուտերեշը։ «Ռազմական հակամարտությունը Հյուսիս- արեւելյան Ասիայում, որտեղ բնակվում է մոլորակի բնակչության մեկ հինգերորդ մասը ու արտադրվում է ՀՆԱ-ի մեկ հինգերորդ մասը, կարող է հսկայական համաշխարհային հետեւանքներ ունենալ»,- հայտնել է Անտոնիու Գուտերեշը։