Ռուսաստանի ֆիսկալային մանեւրը Հայաստանի արտահանման համար մեծ խնդիր չի լինի: Այս մասին NEWS.am-ի հետ զրույցում ասաց ֆինանսների նախարար Վարդան Արամյանը:
Նրա խոսքով՝ ԱԱՀ-ի բարձրացման հնարավոր որոշումը Ռուսաստանում կարող է ապրանքների գնաճի եւ սպառման կրճատման հանգեցնել: «Սակայն ռուսական չափանիշներով մեր արտահանումն այքան փոքր է, որ ապրանքների ճիշտ առաջադրման դեպքում մենք ընդմիշտ կմնանք ռուսական շուկայում»,- նշեց Արամյանը:
Մյուս արտաքին վտանգը Չինաստանի վերակողմնորոշումն է արտահանումից ներքին սպառում եւ ծառայություններ, իսկ սա նշանակում է մետաղի պահանջարկի նվազում եւ գնանկում: Այս կապակցությամբ նախարարը նշեց, որ 2017-ի առաջին եռամսյակում Չինաստանի տնտեսական ակտիվությունն աճել է 6,7 տոկոսով՝ գերազանցելով սպասումները: «Միանգամայն հնարավոր է, որ այս հարցում կարեւոր ազդանշան է եղել հենց սպասումների բարելավումը: Իհարկե, չինական տնտեսության մեջ դեռեւս անորոշություն կա, սակայն աճը շարունակվում է»,- նշեց Վարդան Արամյանը: