Ս.թ. մայիսի 5-ի առավոտյան Ադրբեջանի Հանրապետության զինված ուժերի Աշաղի Աբդուրահմանլի բնակավայրի մոտ տեղակայված մարտական հենակետերից մեկում ՊԲ առաջապահ ստորաբաժանումների կողմից արձանագրվել է հակառակորդի զինծառայողների միջեւ փոխհրաձգության ձայներ, այնուհետեւ նռնակի պայթյուն: Նմանատիպ միջադեպերը հաճախակի կրկնվող երեւույթներ են, որոնք մշտապես դիտարկվում եւ արձանագրվում են հայ դիրքապահների կողմից, ինչը վառ վկայությունն է այն իրողության, որ Ադրբեջանի զինված ուժերում կարգապահական եւ միջանձնային հարաբերությունները շարունակում են մնալ անմխիթար վիճակում:
Վերոնշյալ միջադեպի արդյունքում հակառակորդ կողմը հավանաբար կունենա կորուստներ, որոնց մասին ավանդույթի համաձայն նախընտրում է չհայտարարել: Չի բացառվում նաեւ, որ ադրբեջանական էլիտան, իր երեւակայությանը բնորոշ շեշտադրումներով, ամենայն հավանականությամբ կփորձի կատարվածի արդյունքում տեղ գտած կորուստները վերագրել հայկական կողմին, ասվումէ Արցախի ՊՆ մամուլի հաղորդագրության մեջ: