Կառավարության ընդունելությունների տանն այսօր իրենց մանդատներն են ստացել Ազգային ժողովի նորընտիր 105 պատգամավորները։ Ի դեպ, մանդատ ստանալու արարողությանը ներկա չէր Գագիկ Ծառուկյանը, նաեւ «Ծառուկյան» դաշինքի 8 «ըմբոստները»: «Ելք» դաշինքից ընտրված 9 պատգամավորները եւս չէին ներկայացել արարողությանը:
Մամուլը շարունակում է քննարկել «Ծառուկյան» դաշինքում կատարվածը եւ կուլիսային մանրամասներ բացահայտել։ Ասում են՝ թեկնածուներին մանդատից զրկելու՝ Գագիկ Ծառուկյանի ձգտումը բարկության արդյունք է։ Տեղեկություններ կան, որ այդ թեկնածուները պարտավորություն էին ստանձնել 10-հազարական ձայներ բերել «Ծառուկյան» դաշինքին, բայց նրանցից ոչ մեկը դա չի ապահովել, մինչդեռ այդ ձայների ձեռքբերման համար Ծառուկյանը յուրաքանչյուրին 100-150 մլն դրամ էր տվել: Ծառուկյանն էլ հարց է դրել՝ կամ հրաժարական տալ, կամ վերադարձնել գումարները:
Ծառուկյանն այժմ պետք է որոշի՝ աշխատել ութ ապստամբների հետ խորհրդարանում, թե հեռացնել նրանց խմբակցությունից՝ հաշվի առնելով, որ այդ դեպքում նրա խմբակցության դիրքերը թուլանալու են։ Ի դեպ, նույնիսկ խմբակցությունից հեռացվելու դեպքում այս պատգամավորները, ԱԺ նոր կանոնակարգի համաձայն, չեն զրկվի իրենց մանդատներից։ Ինքնաբացարկի դիմումը հետ վերցրած պատգամավորներից առայժմ միայն Նապոլեոն Ազիզյանն է խոսել այն մասին, որ առանց խնդիրների պատրաստ է աշխատել Գագիկ Ծառուկյանի հետ։ Ավելին՝ նա երեկ հանդիպել է Գագիկ Ծառուկյանի հետ եւ հիմա սպասում է նրա խոսքին, եթե Ծառուկյանը պահանջի, պատրաստ է վայր դնել մանդատը, կամ իր ձեւակերպմամբ «մանդատը դնել Ծառուկյանի ոտքերի առաջ»։
Միեւնույն ժամանակ, մամուլը շարունակում է պնդել, որ Ծառուկյանի դեմ ապստամբության հետեւում կանգնած է «Հանրապետական» կուսակցությունը։ Ազգային ժողովի վերջին ճեպազրույցում այսօր «Հանրապետական» խմբակցության ղեկավար Վահրամ Բաղդասարյանն ասել է՝ մենք այլ կուսակցությունների գործերին չենք խառնվում։ Նաեւ մի ուշագրավ հայտարարություն է արել՝ ակնարկելով, որ «Ծառուկյան» դաշինքի շուրջ սկանդալը կարող է հանցակազմ պարունակել։
Վերջին ճեպազրույցում այս հարցին անդրադարձել է նաեւ ՀԱԿ խմբակցության ղեկավար Լեւոն Զուրաբյանը։ Նրա խոսքով՝ Սերժ Սարգսյանին էր ձեռնտու այս վիճակը, քանի որ համոզված է, որ հաջորդ տարվա ապրիլին, երբ լրանան նախագահի լիազորությունները, Սերժ Սարգսյանը ցանկանալու է դառնալ վարչապետ եւ նրան անհրաժեշտ են լինելու այդ պատգամավորների ձայները։
Զուրաբյանն անդրադարձել է նաեւ քաղաքապետի ընտրություններին, որոնց, ի դեպ, իրենք չեն մասնակցում, ակնարկել, որ դա նույնպես իշխանության կազմակերպած շոուն է։
«Հայ հեղափոխական դաշնակցության» եւ «Հանրապետական» կուսակցության միջեւ կոալիցիոն բանակցությունները ավարտված են, փաստաթուղթը առաջիկա օրերին կհրապարակվի, նախօրեին հայտարարել է Էդուարդ Շարմազանովը։ Նա հերքել է մամուլում տարածված տեղեկությունը, թե Սերժ Սարգսյանը Հովիկ Աբրահամյանին առաջարկել է Ազգային անվտանգության խորհրդի քարտուղարի պաշտոնը, որը նա մերժել է։
Տավուշի մարզում երեկ ականի պայթյունից կապիտան է վիրավորվել: Չորաթանի բնակիչ, 47-ամյա Շիրազ Սահակյանը ստացել է ձախ ոտնաթաթի և ձեռքերի ականապայթյունային վիրավորում եւ տեղափոխվել Բերդի հոսպիտալ: Զինծառայողի ոտքը կտրել են: Նա այսօր տեղափոխվել է Երեւան, որտեղ էլ կշարունակի հետագա բուժումն ու կպրոթեզավորվի: Ականի պայթյունի փաստի առթիվ հարուցվել է քրեական գործ:
Հայկական եւ ռուսական մամուլում կրկին ակտիվացել են լուրերն այն մասին, թե Գյումրիում Ավետիսյանների 7 հոգանոց ընտանիքի սպանության համար ցմահ ազատազրկման դատապարտված Վալերի Պերմյակովը որտեղ է կրելու պատիժը: Չնայած հայկական կողմը դեռ հապաղում է դիրքորոշում հայտնել եւ նշում է միայն, որ քննարկումներ են ընթանում, ռուսական լրատվամիջոցներն արդեն հստակ հայտարարել են, որ Պերմյակովը պատժի մնացած մասը կրելու է Ռուսաստանի Դաշնությունում: Մամուլում տեղեկություններ կան նույնիսկ, որ Հայաստանի ու Ռուսաստանի համապատասխան մարմինները համաձայնություն են ձեռք բերել. Պերմյակովին փոխանակում են Ռուսաստանում պատիժը կրող հայ վարորդ Հրաչյա Հարությունյանի հետ: Նշենք, որ Հրաչյա Հարությունյանն առաջիկայում վերջապես Հայաստան կտեղափոխվի:
Հայաստանի իրավապահները վերջապես բացահայտել են՝ ինչպես է ադրբեջանական խնձորը հայտնվել հայկական շուկայում: Ըստ Գլխավոր դատախազության՝ ադրբեջանական խնձորը Հայաստանի Հանրապետության պետական սահմանով տեղափոխվել է առանց մաքսային հսկողության՝ կաշառքի դիմաց մաքսային ծառայողների թողտվությամբ: Դեպքի առթիվ հարուցվել է քրեական գործ: Թե ովքեր են ներկրել այդ խնձորը, իրավապահները դեռ լռում են:
Կիեւում ընթանում են «Եվրատեսիլ 2017»-ի փորձերը։ Հայաստանը ներկայացնող Արծվիկն այսօր երկրորդ փորձնական ելույթն է ունեցել եվրատեսիլյան բեմում։ Մայիսի 9-ին Կիեւում կկայանա մրցույթի առաջին կիսաեզրափակիչ փուլը, որի ժամանակ ելույթ կունենա նաեւ Հայաստանի ներկայացուցիչ Արծվիկը: Հայ երգչուհին իր եվրատեսիլյան Fly With Me երգը կներկայացնի 16-րդ համարի ներքո: Եզրափակիչը տեղի կունենա մայիսի 14–ին։
Մանչեսթեր Յունայթեդը» ապրիլի լավագույն գոլ է ճանաչել Հայաստանի հավաքականի կիսապաշտպան Հենրիխ Մխիթարյանի գոլը «Սանդերլենդի» դարպասին Անգլիայի առաջնության 32-րդ տուրում: Հայ ֆուտբոլիստի այդ գոլն ամենաարագն է Անգլիայի ընթացիկ առաջնության երկրորդ խաղակեսերի համար:
ԱՄՆ դոլարի փոխարժեքն այսօր՝ մայիսի 5-ին, կազմել է 484, եվրոյինը՝ 531, ֆունտինը՝ 626, ռուբլունը՝ 8.31 դրամ։
Հանրապետության տարածքում մայիսի 6-ին շրջանների զգալի մասում, առավելապես հյուսիսային շրջաններում սպասվում է անձրեւ եւ ամպրոպ, առանձին վայրերում հնարավոր է կարկուտ: Երեւանում մայիսի 6-ին հատկապես գիշերը եւ կեսօրից հետո, սպասվում է անձրեւ եւ ամպրոպ։ Մայրաքաղաքում գիշերը կդիտվի +11+13, ցերեկը՝ +22+24 աստիճան տաքություն։