ՀՀԿ ցուցակով, Երեւանի թիվ 4 ընտրական տարածքից պատգամավոր ընտրված Հարություն Կարապողոսյանը (Սնխչի Հարութ) խորհրդարան է գալիս իր «տեսլականն» իրականացնելու, բայց հրաժարվեց նշել, թե որն է այն:
«Այս պահին թույլ տվեք չասել, թե որն է իմ տեսլականը, աշխատանքի ընթացքում կերեւա: Եթե հիմա սկսեցինք տեսլականները նկարագրել ու բացատրել, մենք հաստատ չենք հասցնի մանդատ ստանալ»,-ասաց նա:
Դիտարկմանը, որ հետընտրական շրջանում մամուլում բազմաթիվ հրապարակումներ եղան, որ ընտրությունների կազմակերպման հետ կապված գումարներ է խոստացել իր շտաբի անդամներին, սակայն ընտրություններից հետո անհետացել է եւ չի պատասխանում նրանց հեռախոսազանգերին, Կարապողոսյանը չցանկացավ անդրադառնալ՝ նշելով. « Ես մի քանի անգամ ասել եմ, ընդամենը պետք է օրենքը կարդալ: Օրենքը եթե կարդաք, այդ հարցը էլ չեք տա»:
Նշենք, որ «Ժամանակ» թերթը գրել էր, որ Երեւանի թիվ 4 ընտրատարածքից ՀՀԿ-ի թեկնածու Հարություն Կարապողոսյանին՝ Սնխչի Հարութին, ապրիլի 3-ից հետո փնտրում են ողջ թիմով, շտաբի պետերով, ընտրությունների «տասովշչիկներով»։
«Բանն այն է, որ ընտրարշավի ժամանակ առանձնահատուկ ջանք չթափած թեկնածուն, որը նույնիսկ Էրեբունիում իր շտաբների ֆինանսական խնդիրները բավարար չափով չի հոգացել, թիմակիցներին խոստացել էր, որ ընտրվելուց հետո «լավ կլինի», բայց անհետացել է՝ կապի դուրս չի գալիս որեւէ մեկի հետ։
«Առանց այն էլ մատը մատին չխփելով՝ Սնխչին Պիստ Արմենի շնորհիվ պատգամավոր դարձավ, գոնե մեր ծախսած գումարները վերադարձնի, շտաբների վարձակալության փողերը»,- դժգոհել է նրա համար աշխատած ՀՀԿ-ականը»,-գրել է թերթը:
Հիշեցնենք, որ Հարություն Կարապողոսյանը հավաքել է մոտ 21 հազար ձայն, նա պաշտպանության նախարար Վիգեն Սարգսյանի թիկնազորի պետ Կարո Կարապողոսյանի հայրն է:
