Հայաստանում ռուսական ռազմաբազան երկրի անվտանգությունն ապահովելու համար է եւ, հնարավոր է, որեւէ ընդլայնում կլինի փոխադարձ ռազմական պայմանավորվածության հիման վրա։ Այս մասին մայիսի 9-ին լրագրողների հետ հանդիպման ժամանակ ասաց Հայաստանում Ռուսաստանի արտակարգ եւ լիազոր դեսպան Իվան Վոլինկինը՝ խոսելով ՌԴ ԱԳ նախարար Սերգեյ Լավրովի հայտարարության մասին։ Լավրովը հայտնել էր Հայաստանում գտնվող ռուսական 102-րդ ռազմաբազայի «Իսլամական պետություն» ահաբեկչական խմբավորման դեմ պայքարելու պատրաստականության մասին։
«Ես կարծում եմ, որ նախարարն ավելի լավ գիտի, քան դեսպանը։ Իսկ առհասարակ ռուսական բազան այստեղ է գտնվում Հայաստանի անվտանգությունն ապահովելու եւ մի շարք խնդիրներ լուծելու համար», - նշեց Իվան Վոլինկինը։
Խոսելով ռազմաբազայի հնարավոր ընդլայնման մասին՝ դեսպանն ասաց. «Դե, հավանաբար, ինչ-որ ընդլայնում կլինի որեւէ փոխադարձ պայմանավորվածության հիման վրա»։
